Ադրբեջանը ցանկանում է Ռուսաստանից 5 մլրդ խմ գազ գնել

Ադրբեջանը պատրաստ է Ռուսաստանից տարեկան 5 մլրդ խմ գազ գնել: Այս մասին, ինչպես հաղորդում է «Արմենպրես»-ը' վկայակոչելով «Թրենդ»-ը, այսօր Բաքվում լրագրողներին հայտարարել է Ադրբեջանի պետական նավթային ընկերությոն' SOCAR-ի ղեկավար Ռովնագ Աբդուլլաևը:

«Ադրբեջանի պետնավթաընկերությունը ռուսաստանյան «Գազպրոմ»-ին առաջարկություն է ուղարկել տարեկան 3-5 մլրդ խմ գազ գնելու մասին»,- հայտնել է Աբդուլլաևը:

Ըստ ԱՊԱ-ի' SOCAR-ի ղեկավարը մարտին հայտնել էր, որ ծրագրում են ռուսաստանյան «Գազպրոմ» ընկերությունից տարեկան 3 մլրդ խմ գազ գնել:

«Մեզ այդ գազը պետք է, որպեսզի այն ներմղենք նավթաշերտեր' նավթի կայուն արդյունահանումն ապահովելու համար: Բացի այդ, մեր գազապահեստարանների ծավալը կազմում է 5 մլրդ խմ, և մենք ուզում ենք ստուգել դրանց առավելագույն բեռնավորումը»,-ասել էր նա:

SOCAR-ի ղեկավարը նաև հայտնել էր, որ միաժամանակ բանակցություններ են վարում նաև իրանական կողմի հետ:

«Խոսքը գազի կուտակման գործողությունների մասին է: Մենք ցանկանում ենք գազ կուտակել պահեստներում, իսկ ձմռանը մատակարարել Իրանի հյուսիսային շրջաններ»,- ասել է նա:

Հիշեցնենք, որ ՌԴ նախկին վարչապետ, իսկ այժմ «Գազպրոմ» ընկերության տնօրենների խորհրդի նախագահ Վիկտոր Զուբկովը, անդրադառնալով եվրոպական շուկայում ռուսաստանյան գազին Ադրբեջանի մրցակից դառնալու հարցին, Բաքվում հայտարարել էր. «Ի՞նչ է Ադրբեջանը: Նա այժմ մեզնից տարեկան 2 մլրդ խմ գազ է գնում: Մենք այդ մասին Բաքվի հետ մինչև 2025 թվականը պայմանագիր ունենք»:

Զուբկովը նաև հավելել էր, որ Ադրբեջանին չի փրկի նաև «Շահ Դենիզ» գազի հանքահորի գործարկումը Անդրաադրիատիկ գազատարով (TAP) Եվրոպա գազ հասցնելու համար:

«Դա դեռ պետք է լինի 2020 թվականին: Իսկ մինչ այդ, ինչպես ասում են, դեռ պետք է ապրել»,- ասել էր նա: