Ադրբեջանը վերսկսել է ակտիվիստների հետապնդումները. Freedom House

Ադրբեջանական NIDA երիտասարդական շարժման ակտիվիստներ Բայրամ Մամեդովի և Գիյաս Իբրահիմովի ձերբակալությունից հետո Freedom House միջազգային իրավապաշտպան կազմակերպությունը հանդես է եկել հայտարարությամբ, որում նշել է, որ կարճատև դադարից հետո Ադրբեջանը վերսկսել է ակտվիստների հետապնդումները: Ինչպես հաղորդում է «Արմենպրես»-ը, Freedom House-ի փոխնախագահ Ռոբերտ Հերմանն այդ առնչությամբ ասել է. «24 քաղաքական և կրոնական բանտարկյալների ազատ արձակումից հետո ադրբեջանական իշխանություններն, ինչպես երևում է՝ ձգտում են լցնել դատարկված բանտախցերն ազատության նոր պաշտպաններով»:

Նա նշել է, որ ժողովրդավարական երկրները պետք է պահանջեն, որպեսզի Ադրբեջանը հարգի հիմնարար ազատությունները և թույլատրի քաղաքացիական հասարակությանն ազատորեն իրագործի իր գործունեությունը:

Երիտասարդ ակտիվիստներ Բայրամ Մամեդովը և Գիյաս Իբրահիմովը մայիսի 10-ին ձերբակալվել են թմրանյութերի ապօրինի պահման մեղադրանքով: Բաքվում դատարանը նրանց ձերբակալել է 4 ամիս ժամկետով և նրանց 12 տարվա ազատազրկում է սպասվում:

NIDA շարժումը հայտարարել է, որ ակտվիստների ձերբակալության իրական պատճառն այն է, որ նրանք կասկածվում են Բաքվում Ադրբեջանի կենտրոնական բանկի դիմաց Հեյդար Ալիևի ծննդյան օրը նրա արձանի պատվանդանի կողերին ադրբեջաներենով և անգլերենով Qul Bayramınız MՖbarək (Շնորհավորում ենք ստրուկի օրվա առթիվ), իսկ առաջնակողմում՝ Fuck the system (Կորչի հասարակարգը) գրություններ կատարելու մեջ, ինչը մեծ արձագանք էր առաջացրել Ադրբեջանում:

Երիտասարդների փաստաբան Էլչին Սադըգովը լրագրողներին ասել է, որ դատարանի կողմից նրանց նկատմամբ թմրանյութի հետ կապված մեղադրանքի առաջադրումը կապված է Հեյդար Ալիևի արձանի հարցի հետ: «Նրանց մեղադրեցին թմրանյութի հարցով: Ինքնագլուխ, բռնությամբ ներխուժեցին տուն: Խուզարկության ժամանակ տնեցիներց ոչ մեկը չի մասնակցել: Տղաները բոլորովին կապ չունեն թմրանյութի հետ»,- ասել է նա: Փաստաբանն ասել է, որ Գիյաս Իբրահիմովը հրաժարվել է հարցաքննության ժամանակ խոշտանգումներով տված իր ցուցմունքներից:

«Նրանք համառում են, որ հենց այդ տղաներն են արձանի վրա գրության հեղինակները: Դատարանում նրանցից պահանջել են արձանի առաջ ներողություն խնդրել: Ասել են, որ համաձայնեք ներողություն խնդրելու ժամանակ AzTv-ն նկարահանի, ազատ թողնենք ձեզ»,- լրագրողներին հայտնել է փաստաբանը:

Ադրբեջանի ներքին գործերի նախարարությունը միջադեպի հետ կապված հայտարարության մեջ նշել է, որ Բայրամ Մեմմեդովի մոտից 2,904 գ հերոին տեսակի թմրանյութ է հայտնաբերվել, իսկ նրա տանից՝ 1 կ 150 գ հերոին: Գիյաս Իբրահիմովի մոտից' 2,607 գ հերոին, իսկ նրա տանից՝ 1 կգ 10 գ հերոին:

Ադրբեջանի կենտրոնական բանկի դիմացի այգում գտնվող Հեյդար Ալիևի՝ այդ գրություններով արձանի լուսանկարը հայտնվել էր Facebook սոցցանցում, ինչը մեծ արձագանք էր առաջացրել Ադրբեջանում:

Այդ երկրում ավանդույթ է դարձել իշխանություններին, կառավարությանը քննադատաող ակտիվիստներին, ընդդիմադիրներին և քաղաքական-հասարակական գործիչներին, անգամ կրոնականներին թմրանյութերի հետ կապված հոդվածներով մեղադրանքներ ներկայացնելն ու բանտեր նետելը:

Ադրբեջանը մնում է անազատ մամուլ ունեցող երկրների թվում:

Միջազգային և ադրբեջանական իրավապաշտպան կազմակերպությունների տվյալներով՝ Ադրբեջանում ներկայում մոտ 100 քաղաքական բանտարկյալներ կան, որոնցից 28-ը ճանաչվել է խղճի բանտարկյալ: