EgyptAir-ի անհետացած ինքնաթիռի ավտոմատ համակարգերն աղետի ազդանշան են տվել

EgyptAir-ի անհետացած A320 ինքնաթիռի ավտոմատ համակարգերը աղետի ազդանշան են տվել Կահիրեի ժամանակով ժամը 04.26-ին (Երևանի ժամանակով՝ ժամը 06.26-ին): Այդ մասին հայտարարել է Եգիպտոսի քաղաքացիական ավիացիայի նախարարությունը, հաղորդում է ՌԻԱ «Նովոստի»-ն:

Տեղեկությունը գերատեսչությանը հայտնի է դարձել Եգիպտոսի ռազմածովային ուժերի որոնողա-փրկարարական խմբի կողմից:

SkyNews Arabia արբանյակային հեռուստաալիքը՝  Եգիպտոսի ավիացիայի նախարարության աղբյուրներին հղումով, հայտնում է, որ А320 ինքնաթիռը 2013թ. տեխնիկական անսարքության պատճառով հարկադիր վայրէջք է կատարել Կահիրեի օդանավակայանում:

Ենթադրաբար, անսարքությունը գրանցվել է ինքնաթիռի շարժիչներից մեկում 2013թ.: Այն ժամանակ ինքնաթիռն ուղևորվում էր Ստամբուլ, բայց ստիպված է եղել վերադառնալ: Մասնագետները շարժիչներից մեկի արձանագրել են գերտաքացում:

EgyptAir ավիաընկերության Փարիզից Կահիրե ուղևորվող ուղևորատար ինքնաթիռն անհետացել է ռադարներից: Օդանավը դուրս էր եկել Շառլ-դե-Գոլի օդանավակայանից, ինքնաթիռում եղել է 66 մարդ՝ 56 ուղևոր, այդ թվում՝ 3 երեխա, և անձնակազմի 10 անդամներ: EgyptAir-ը ստեղծել է օպերատիվ շտաբ, որի մեջ ներառվել են բոլոր ավիացիոն ծառայությունների ներկայացուցիչները։ Որոնումներով զբաղվում է Եգիպտոսի և Հունաստանի ռազմական ավիացիան։