Խադիջա Իսմայիլովան պայմանականորեն ազատ է արձակվել

Ադրբեջանի գերագույն դատարանի վճռով այսօր բանտից պայմանականորեն ազատ է արձակվել «Ազատություն» ռադիոկայանի ադրբեջանական ծառայության հետազոտող-լրագրող Խադիջա Իսմայիլովան:

Այս մասին, ինչպես հաղորդում է «Արմենպրես»-ը, հայտնում է «Թուրան» լրատվական գործակալությունը:

Այսօր նա դուրս կգա բանտից, սակայն, կհամարվի դատապարտյալ, քանի որ քրեական գործը նրա վրայից հանված չէ, բայց կրճատվել է մինչև 5 տարի:

Առաջին ատյանի դատարանը 2015 թվականին նրան ազատազրկել էր 7,5 տարի ժամկետով: Նա ձերբակավել էր 2014 թվականի դեկտեմբերին:

Այսօրվա դրությամբ Խադիջա Իսմայիլովան հանդիսանում էր Ադրբեջանի գլխավոր քաղաքական բանտարկյալը, որի ազատումը պահանջել էին գործնականում բոլոր միջազգային և տեղական ժողովրդավարական ուժերը:

Խադիջա Իսմայիլովան Ադրբեջանում ձերբակալվել է անցյալ տարվա դեկտեմբերի 5-ին' նախկին գործընկերոջն ինքնասպանության հասցնելու շինծու մեղադրանքով, և հետո «խոշոր չափերի յուրացում և զեղծարարության», «ապօրինի ձեռնարկատիրության», «հարկերի վճարումից խուսափելու», «պաշտոնեական լիազորությունները չարաշահելու» կեղծ մեղադրանքներով դատապարտվել 7,5 տարվա ազատազրկության:

Խադիջա Իսմայիլովան Ադրբեջանի իշխանությունների թիրախ է դարձել իր լրագրողական գործունեության համար: Իսմայիլովան հանդիսանում է Ադրբեջանում իշխանության վերին էշելոններում կոռուպցիոն փաստերի լրագրողական հետաքննությունների հեղինակ, որոնց արդյունքում բացահայտվել է նաև Ադրբեջանի նախագահ Իլհամ Ալիևի և նրա ընտանիքի օֆշորյան գոտիներում ունեցած հարյուրավոր միլիոն դոլարների հասնող ունեցվածքը:

Բանտում գտնվելու ժամանակահատվածում Խադիջա Իսմայիլովան արժանացել է Գյոթեբորգի Handels-och-Sjofarstidning (GHT) լիբերալ թերթի «Holme տարվա հերոս», միջազգային հեղինակավոր Alison Des Forges, ԱՄՆ-ի Ազգային մամուլի ակումբի Մամուլի ազատության, միջազգային «PEN/Barbara Goldsmith գրելու ազատություն», IRE-ի Tom Renner, UNESCO-ի 2016 թվականի Guillermo Cano Համաշխարհային մամուլի ազատության և Շվեդիայի ազգային մամուլի ակումբի «Աննա Պոլիտկովսկայա խոսքի ազատություն» պարգևներին:

Foreign Policy հանդեսն Ադրբեջանում շինծու մեղադրանքներով և քաղաքական դրդապատճառներով դատապարտված ադրբեջանցի լրագրող Խադիջա Իսմայիլովային մտցրել է 100 գլխավոր համաշխարհային մտածողների ցուցակ:

Amnesty International-ը և այլ միջազգային կազմակերպություններ նրան ճանաչել են «խղճի դատապարտյալ»: