Ռուսաստանը հրապարակել է ԻՊ-ին քիմիական նյութեր ուղարկող թուրքական ընկերությունների ցանկը

ՄԱԿ-ում Ռուսաստանի Դաշնության մշտական ներկայացուցիչ Վիտալի Չուրկինը հրապարակել է Սիրիայում կառավարական ուժերի դեմ կռվող «Իսլամական պետություն» (ԻՊ) ահաբեկչական խմբավորման կողմից պայթուցիկ սարքավորումներում օգտագործվող քիմիական նյութեր մատակարարող թուրքական ընկերությունների ցանկը:

Ինչպես հաղորդում է «Արմենպրես»-ը՝ վկայակոչելով Sputnik-ը, ՄԱԿ-ի գլխավոր քարտուղարություն հղած նամակում Չուրկինը նշել է, որ ԻՊ-ին քիմիական նյութեր են ուղարկում GՖltaş Kimya, Marikem Kimyevi և EndՖstriyel ՆrՖnler, Metkim, Ekim GՖbre և Diversey Kimya թուրքական ընկերությունները:

«Իրաքի Թիքրիթ և Սիրիայի Քոբանի տարածաշրջաններում ԻՊ-ի մարտիկների կողմից օգտագործված պայթուցիկների մնացորդների անալիզը ցույց է տվել, որ այդ նյութերն արտադրվել են Թուրքիայում: ԻՊ-ին ուղարկված քիմիական նյութերի մեջ հայտնաբերվել են այլումինի փոշի, ամոնիումի նիտրատ, կարբամիդի հատիկներ և ջրածնի գերօքսիդ, որոնք արտադրել են թուրքական հիշյալ ընկերությունները»,- նամակում նշել է Չուրկինը՝ հավելելով, որ Թուրքիայից Սիրիա ամոնիումի նիտրատի առաքումները 7 անգամ աճել են:

Ռուս պաշտոնյան նաև նշել է, որ ԻՊ-ի մերձավորարևելյան մասնագետների պատրաստած պայթուցիկներում հայտնաբերվել են ԱՄՆ-ի Microchip Technology ընկերությանը պատկանող «միկրոհսկիչներ», Շվեյցարիայի ST Microelectronics ընկերության կողմից արտադրվող «տրանզիստորներ» և Nokia 105 RM-908 տեսակի հեռախոսներ: