G7-ի ղեկավարները պայմանավորվեցին պայքարել գլոբալ տնտեսության ռիսկերի դեմ. Աբե

G7-ի երկրների ղեկավարների գագաթնաժողովում, որն ընթանում է ճապոնական Իսե-Սիմա ազգային զբոսայգում, պայմանավորվել են գլոբալ տնտեսության ռիսկերի դեմ պայքարի միջոցառումների շուրջ՝ նպատակ ունենալով կանխել ճգնաժամերը: Այդ մասին, ինչպես տեղեկացնում է «Արմենպրես»-ը, մամուլի ասուլիսում հայտարարել է Ճապոնիայի վարչապետ Սինձո Աբեն:

«Մենք համակարծիք ենք, որ համաշխարհային տնտեսության մեջ այժմ գոյություն ունեցող ռիսկերը մտահոգիչ են, և պայմանավորվեցինք այդ խնդրի լուծման համար համատեղ միջոցներ ձեռնարկելու անհրաժեշտության մասին»,-ասել է նա: Ճապոնիայի կառավարության ղեկավարի խոսքով՝ G7-ի երկրները նաև պայմանավորվել են «գործարկել այսպես կոչված Իսե-Սիմայի գագաթնաժողովի նախաձեռնությունը», որը գործողությունների համաձայնեցում է նախատեսում համաշխարհային տնտեսությանն օժանդակելու համար:

Ավելի վաղ հաղորդվել է, որ «Մեծ յոթնյակի» երկրների ղեկավարներն աշխատանքային ճաշկերույթի շուրջ քննարկել են համաշխարհային տնտեսության հիմնախնդիրները և դրա կայունացման միջոցառումները: Մասնավորապես, կայացած հանդիպմանը G7-ի ղեկավարները քննարկել են ֆոնդային շուկաներում անկայունության հաղթահարման ուղիները, ինչը կապված է Չինաստանի ՀՆԱ-ի աճի տեմպերի նվազման և նավթի ցածր գների հետ: Բացի այդ, կողմերը արծարծել են կիբեռանվտանգության ապահովման հարցերը, ինչը, «յոթնյակի» երկրների կարծիքով, ֆինանսական հոսքերի անարգել շարժման ու տնտեսական աճի կարևոր բաղադրիչն է:

Ճապոնիայի վարչապետ Սինձո Աբեն, ամփոփելով հանդիպման արդյունքները, նշել է, որ նավթի գների անկման, ահաբեկչության սպառնալիքի և միգրացիոն ճգնաժամի պատճառով «համաշխարհային տնտեսության մեջ պահպանվում է անորոշությունը»: Նա նաև կարծիք է հայտնել, որ «յոթնյակի» ղեկավարները պետք է հանդես գան «ուժեղ ու հստակ ուղերձով, ինչպես նաեւ համատեղ միջոցներ ձեռնարկեն՝ ելնելով իրենց երկրների տնտեսական իրադրությունից», գրում է «Կիոդո» գործակալությունը:

Ինչպես սպասվում է, նստաշրջանի արդյունքները կարտացոլվեն G7-ի գագաթնաժողովի արդյունքների վերաբերյալ ամփոփիչ հայտարարության մեջ:

Մայիսի 26-ին բացված գագաթնաժողովը կաշխատի երկու օր՝ հաղորդել է ՏԱՍՍ-ը: