Բաքվում ձերբակալվել է հերթական ընդդիմադիր ակտիվիստը

Ադրբեջանի NIDA երիտասարդական շարժման ակտվիստ Անար Աբդուլլաեւը ձերբակալվել եւ տարվել է Բաքվի Նարիմանովի շրջանի ոստիկանական բաժանմունք:

Այս մասին, ինչպես հաղորդում է «Արմենպրես»-ը՝ վկայակոչելով Meydan TV ինտերնետային հեռուստաալիքի կայքը, հայտնել է իրավաբան Նիջաթ Մամեդբեյլին:

Ակտիվիստի փաստաբան Շահլա Հումբաթովան լրագրողներին ասել է, որ ներկայում ինքը գտնվում է ոստիկանական բաժանմունքում, և, չնայած նրան պաշտպանելու վկայագիր ունի, սակայն, իրեն թույլ չեն տալիս գնալ Անար Աբդուլլաեւի մոտ:

Ոստիկանությունը չի հայտնել ակտվիստին ձերբակալելու պատճառը:

Վերջին մեկ շաբաթվա ընթացքում Անար Աբդուլլաեւը NIDA-ի թվով երրորդ ձերբակալված ակտիվիստն է:

Կայքը հայտնում է, որ Բաքվի վճռաբեկ դատարանը մերժել է անցյալ շաբաթ ձերբակալված NIDA-ի երիտասարդ ակտիվիստ Բայրամ Մամեդովի և «Ձախ ճակատի» անդամ Գիյաս Իբրահիմովի մեկուսացումը տնային կալանքով փոխարինելու մասին դիմումը՝ նշելով, որ այս մասին «Թուրան»-ին հայտնել է նրանց փաստաբան Էլչին Սադըգովը:

Երիտասարդները մեղադրվում են թմրանյութերի ապօրինի շրջանառության մեջ, սակայն, նրանց ձերբակալության իրական պատճառն, ինչպես իրենք են գտնում, Հեյդար Ալիևի արձանի պատվանդանի կողերին ադրբեջաներենով և անգլերենով Qul Bayramınız MՖbarək (Շնորհավորում ենք ստրուկի օրվա առթիվ), իսկ առաջնակողմում՝ Fuck the system (Կորչի համակարգը) գրություններ անելն է:

Ազգային դատարաններում ձերբակալությունը բողոքարկելու հնարավորություններն ավարտվելու պատճառով երիտասարդների ազատության և անձնական անձեռնմխելիության իրավունքը խախտվելու համար նրանց դատապաշտպաններն այժմ պատրաստվում են դիմել Մարդու իրավունքների եվրոպական դատարան:

Փաստաբանի խոսքով՝ խոշտանգումների ենթարկվելու պատճառով դատախազության որոշումով երկու երիտասարդներն էլ մայիսի 26-ին դատա-բժշկական փորձաքննություն են անցել:

Meydan TV-ն այդ առնչությամբ գրում է, որ Ադրբեջանն այսօր մի երկիր է, որում իշխանության մարմիններում, սկսած պետության ղեկավարից մինչև բանտապահ, «պատվի» և «խղճի» մասին խոսքերն ունեն ամենախեղաթյուրված իմաստը:

Ադրբեջանն այսօր մի երկիր է, որտեղ ոստիկանության, անվտանգության ծառայությունների և դատախազության քննիչ-հետաքննիչները կարող են ժպիտը շուրթերին սեռական հարաբերություն կազմակերպել կասկածյալի կնոջ հետ՝ նրա երեխաների և ազգականների աչքի առաջ:

Ադրբեջանն այսօր այն երկիրն է, որտեղ կասկածյալին կարող են սպառնալ ոստիկանական մահակի կիրառմամբ՝ սեռական ակտով, և այդ սպառնալիքն իրականացնել տեսանկարահանումով՝ ապագա շանտաժի համար:

Ադրբեջանում ավանդույթ է դարձել իշխանություններին, կառավարությանը քննադատող ակտիվիստներին, ընդդիմադիրներին և քաղաքական-հասարակական գործիչներին, անգամ կրոնավորներին թմրանյութերի հետ կապված հոդվածներով մեղադրանքներ ներկայացնելն ու բանտեր նետելը:

Միջազգային և ադրբեջանական իրավապաշտպան կազմակերպությունների տվյալներով՝ Ադրբեջանում ներկայում մոտ 100 քաղաքական բանտարկյալներ կան, որոնցից 28-ը ճանաչվել են խղճի բանտարկյալներ: