Ադրբեջանը գնում է ժողովրդից գողացած փողերով Ալիևների ձեռք բերած ոսկու հանքերը

Ադրբեջանը երկրի նախագահի ընտանիքի անդամներից կգնի մի քանի միլարդ դոլար արժեցող ոսկու 6 հանքերը, որոնք նրանք կոռուպցիոն ճանապարհով գողացել են ադրբեջանական ժողովրդից 9 տարի առաջ:

Այս մասին, հայտնում է Meydan TV ինտերնետային հեռուստաալիքի կայքը:

Ըստ կայքի' Ադրբեջանի նախագահ Իլհամ Ալիևը հրամանագիր է ստորագրել «Ադրբեջանում Գարադաղ, Չովդառ, Գյոյդաղ, Դաղքեսեմեն, Քոխհեմեդան եւ Քյուրեքչայի ավազանի ոսկու հանքերում հետազոտությունների, եւ մշակման ոլորտում մի շարք միջոցառումների մասին»: Խոսքը այդ հանքերի մշակման մեջ արտասահմանյան ընկերությունների մասնակցության մասնաբաժինը պետության կողմից գնելու մասին է: Առաջարկությունն ստացվել է Ադրբեջանի բնապահպանության եւ բնական ռեսուրսների նախարարությունից:

Ալիևը էկոնոմիկայի նախարարությանը և 2015 թվականի սկզբին ստեղծված AzerGold ՓԲԸ-ին հանձնարարել է անհրաժեշտ միջոցներ ձեռնարկել կապալառուներին պատկանող մասնաբաժինը AzerGold -ի կողմից ձեռք բերելու առնչությամբ (contact.az):

Ալիևը 9 տարի առաջ իր 20 և 22-ամյա երկու դուստրերին' Լեյլա և Արզու Ալիևաներին պատկանող մի քանի միլիարդ դոլար արժեցող 6 ոսկու հանքերը փոխանցել է օգտագործման չորս արտասահմանյան ընկերությունների: Իրականում բոլոր հանքերը հանձնվել են նախագահական ընտանիքի օգտագործմանը (Meydan TV):

«Ազատություն» ռադիոկայանի լրագրող Խադիջա Իսմայիլովայի և Կոռուպցիայի ու կազմակերպված հանցագործության ուսումնասիրության գծով կենտրոնի (OCCRP) կողմից անցկացված հետազոտության մեջ ցույց էր տրվել, որ Չովդար և այլ ոսկու հանքերը վերահսկող ընկերությունների հետևում կանգնած են Ադրբեջանի նախագահի դուստրերը:

Ինչպես վկայում են Panama Papers (Պանամյան արխիվ) փաստաթղթերը, Իլհամ Ալիևի դուստրերը' Լեյլա և Արզու Ալիևաներն ամբողջությամբ վերահսկում են Պանամայում գրանցված Londex Resources S.A ընկերությունը, որին պատկանում է ոսկու հանքերի կոնսորցիումի կառավարման 45 տոկոսը: Արզու և Լեյլա Ալիևաների ընդհանուր մասնաբաժինն այդ ընկերությունում կազմում է 56 տոկոս:

Կայքը հայտնում է, որ Ալիևների ընտանիքից ոչ մեկը չի արձագանքել OCCRP-ի կողմից մեկնաբանություն տալու մասին իրենց հասցեին արված խնդրանքներին:

Վերջին տարիներին հիշյալ ոսկու հանքերում աշխատանքները դադարեցվել են, առաջացել են աշխատավարձի գծով հսկայական պարտքեր:

Պանամյան փաստաթղթերի համաձայն' Londex Resources S.A ընկերությունը ոսկու արդյունահանման վրա ծախսել է մոտ 230 մլն դոլար և մինչև գործունեության անսպասելի դադարեցումն արդյունահանել 30 մլն դոլարի ոսկի:

OCCRP-ն գտնում է, որ նման հնարավորություններով ընկերության անսպասելի կերպով կորչելու ենթադրյալ պատճառներից մեկը կարող է լինել սեփականության կառույցի ոչ թափանցիկությունը, ինչի հետևանքով այն անսպասելի դժվարությունների է հանդիպել ոսկու իրացման ժամանակ:

Հնարավոր է' հենց դրանով են բացատրվում հանքերում աշխատանքի դադարեցումը և աշխատակիցների աշխատավարձի գծով պարտքերը, և որպես հետևանք, Ալիևը որոշել է սեփական պետությանը վաճառել այդ օֆշորային ընկերությունում իր մասնաբաժինը:

«Այսպիսով, Ադրբեջանի հանրապետությունը Ադրբեջանի նախագահի ընտանիքի անդամներից կգնի միլիարդավոր դոլարների ոսկու 6 հանքեր, որոնք նա 2007 թվականին կոռուպցիոն ճանապարհով գողացել է ադրբեջանական ժողովրդից»,- գրում է Meydan TV-ն: