Մուրացկաններին Բաքվից հավաքում են. «Ֆորմուլա -1»-ի պատճառով

Բաքվում հունիսի 18-ին անցկացվելիք «Ֆորմուլա-1» մրցումների համար իրավապահ մարմինները Ադրբեջանի մայրաքաղաքից սկսել են հավաքել մուրացկանությամբ զբաղվող անձանց: Ոստիկանությունը նրանց հավաքում և ուղարկում է իրենց մշտական գրանցման շրջաններ:

Ինչպես հաղորդում է ադրբեջանական faktxeber.com լրատվական կայքը՝ Բաքվի պետական ճանապարհային ոստիկանության վարչության հասարակայնության հետ կապերի բաժնի ղեկավար Վագիֆ Ասադովը փողոցներից մուրացկաններին հավաքելու գործողությունը «բացատրել» է այն բանով, որ նրանք «շեղում են վարորդների ուշադրությունը և վթարային վիճակ ստեղծում»:

Ոստիկանության փոխգնդապետը նշել է, որ Բաքվից մուրացկաններին հավաքելը կապված չէ «Ֆորմուլա- 1» մրցումների հետ, այլ կապված է «հասարակական կարգի պահպանման հետ»:

«Մենք աշխատում ենք պահպանել հասարակական կարգն ու ապահովել անվտանգությունը: Դա անում ենք, որպեսզի մրցումների ժամանակ մասնակիցները գոհ լինեն իրենց տեսած պատկերներից: Այսօր մուրացկանությամբ զբաղվող, վարորդների ճանապարհները կտրող, խաչմերուկներում ավտոմեքենաների առաջ վազող անձանց և երեխաներին տեսնող մարդիկ անհանգստության զգացումներ են ունենում: Այդ իմաստով կարևոր է, որպեսզի մուրացկաններին հավաքենք մայրաքաղաքի փողոցներից»,- այսպես է բացատրել իրենց գործողությունները ադրբեջանցի պաշտոնյան:

Նավթի և մանաթի խիստ էժանացման պատճառով խորը տնտեսական ճգնաժամում հայտնված Ադրբեջանի շրջաններից աղքատության շեմից ցածր կենսամակարդակ ունեցող հազարավոր մարդիկ Բաքվի փողոցներում աշխատում են գոյություն պահպանել մուրացկանությամբ:

«Ֆորմուլա-1»-ը Բաքվում անցկացնելու համար Ադրբեջանը միջազգային կառույցին 50 մլն դոլար է վճարել, իսկ խաղերի անցկացման վրա կատարված ընդհանուր ծախսերը կազմել է 150 մլն դոլար:

Ադրբեջանի կոռումպացված իշխանությունները գտնում են, թե «Եվրատեսիլ», «Եվրոպայի խաղեր», «Ֆորմուլա» միջազգային միջոցառումներ կազմակերպելով, կարող են բարձրացնել իրենց հեղինակությունն ու վարկանիշը: Նման միջոցառումների ժամանակ իշխանությունները Բաքվից հավաքում են արտասահմանցու աչքի համար «ոչ բարետես» ամեն ինչ: Օրինակ' «Եվրատեսիլ» երգի միջազգային մրցույթի ժամանակ Բաքվի կենտրոնական փողոցներից, օդավակայանից մինչև Բաքու մայրուղուց հավաքվել էին Ադրբեջանի «համազգային առաջնորդ» Հեյդար Ալիևի և նրա որդու' նախագահ Իլհամ Ալիևի դիմապատկերներով պաստառները՝ փորձելով թաքցնել նրանց նկատմամբ անձի պաշտամունքի առկայությունը երկրում: