Ուզում ենք, որ թուրքերն էլ հայերից ստանան այն, ինչ մենք ենք ստացել` ներում. Ալբերտ Վայլեր

Բունդեսթագի կողմից Հայոց ցեղասպանության ճանաչումով Գերմանիան կոչ է անում թուրքական կողմին հաշտեցման և ճանաչման ճանապարհին անել առաջին բարդ քայլը: Այս մասին Բունդեսթագում Հայոց ցեղասպանության մասին բանաձևի քննարկան ժամանակ իր ելույթում ասաց Քրիստոնեադեմոկրատական միության պատգամավոր Ալբերտ Վայլերը:

«Օսմանյան կայսրությունում հայերի ու մյուս քրիստոնյաների նկատմամբ տեղի ունեցածն ինձ շատ է հուզում: Մենք պատմական պատասխանատվություն ունենք երիտթուրքերի դաժանություններն անվանել իրենց անունով' Ցեղասպանություն»,- նշեց Վայլերը: Նա ընդգծեց, որ Հայոց ցեղասպանության բանաձևը Բունդեսթագի բոլոր խմբակցությունների համատեղ նախաձեռնությունն է, և իրենցից ոչ ոք կասկածի տակ չի առնում պատմական այս իրողությունը:

«Որպես մարտահրավեր կա ու կմնա Թուրքիայի կողմից այս փաստի ճանաչումն ու ընդունումը, դրան ազնիվ ու բաց անդրադարձը: Մինչ օրս Թուրքիայի կառավարությունը դիրքորոշում չի որդեգրել այն անարդարության հանդեպ, որը տեղի է ունեցել հայերի նկատմամբ: Այս նախաձեռնությամբ մենք ուզում ենք բացել այն ճանապարհը, որով կընդունենք մեր համատեղ մեղքը, քանի որ առանց դրա հաշտեցում չի լինի: Ցեղասպանության ճանաչումն այլ ցեղասպանությունները կանխելու ճանապարհն է և այն հարգանքի տուրքը, որը պետք է մատուցել Ցեղասպանության զոհերի միլիոնավոր ժառանգերին: Այս չափի տառապանքը չի կարելի մոռացության մատնել: 21-րդ դարում մենք գիտակցում ենք, որ դա մեր համատեղ եվրոպական անցյալի հարցն է, այն բոլորիս է առնչվում, սակայն մենք ուզում ենք առաջ գնալ, մենք ուզում ենք, որ հայերն ու թուրքերն ապրեն այն, ինչ մենք' գերմանացիներս, ուզում ենք, որ թուրքերն էլ հայերից ստանան այն, ինչ մենք ենք ստացել՝ ներում»,- ասաց պատգամավորը' նշելով, որ թեպետ գործընթացը բարդ է ու ցավոտ, սակայն առանց այդ անդրադարձի, առանց վերարժևորման, ոչինչ չէր լինի:

«Ուրախալի է, որ այսօրվա Թուրքիայում մարդիկ կան, ում նպատակն է հայերի հանդեպ կատարվածը ճանաչել ու դրա հետ հաշտվել: Մեր հայտով ուզում ենք աջակցություն ցուցաբերել այդ քաջ և արի տղամարդկանց ու կանանց: Մենք համատեղ կաշտատենք այն ուղղությամբ, որ Օսմանյան կայսրությունում տեղի ունեցածը Թուրքիայի կառավարության կողմից վերաիմաստավորվի հօգուտ հայերի ու թուրքերի՝ ի նպաստ համատեղ ու խաղաղ կեցության այս տարածաշրջանում»,- նման կերպ իր խոսքը եզրափակեց Վայլերը: