Արտակարգ դրություն կհայտարարվի Ֆրանսիայում

Ֆրանսիայի՝ հեղեղումներից առավել տուժած շրջաններում արտակարգ դրություն կսահմանվի: Այդ մասին հայտարարել է Ֆրանսիայի նախագահ Ֆրանսուա Օլանդը, տեղեկացնում է BBC-ն:

Ֆրանսիայի 26 դեպարտամենտներում, այդ թվում՝ Փարիզում, տագնապի նարնջագույն մակարդակ է հայտարարված տեղատարափ անձրևների պատճառով, որոնք հանգեցրել են սաստիկ հեղեղումների: Երկրում ամենաանձրևոտ մայիսն է գրանցվել վերջին 150 տարվա ընթացքում:

Ավելի վաղ Ֆրանսիայի ներքին գործերի նախարարությունը հայտնել է, որ երկրում հեղեղումների պատճառով ավելի քան 5,5 հազար մարդ է տարհանվել: Տեղեկություն կա տարեց մի կնոջ զոհվելու մասին:

Սենում ջրի հոսանքի արագությունն օրվա ընթացքում կտրուկ աճել է: Գետում կտրականապես արգելված է նավարկությունը:

Երեք օր անընդմեջ տեղացած անձրևներից հետո Սենի ջրի մակարդակը Փարիզի սահմաններում 4,15 մետրով գերազանցել է սովորական մակարդակը և շարունակում է աճել: Այդ պատճառով փակվել են մետրոյի մի քանի գծեր: Հեղեղված են Պոմպիդուի առափնյակը և Օրսի առափնյակի մի մասը:

Օդերեւութաբանների կանխատեսումների համաձայն՝ Կենտրոնական Եվրոպայում՝ Ֆրանսիայից մինչեւ Ուկրաինա, հորդառատ անձրեւները կշարունակվեն մինչեւ հանգստյան օրեր: Սպասվում է, որ առանձին վայրերում մի քանի ժամում կգրանցվեն մինչեւ 50 միլիմետր տեղումներ:

Լուվրի թանգարանը հունիսի 3-ին փակվել է նախազգուշական նկատառումներով, Օրսի թանգարանը նախօրյակին սովորականից շուտ է փակվել:

Փարիզում եւ Ֆրանսիայի կենտրոնական մասում շուրջ 25 հազար մարդ մնացել է առանց էլեկտրաէներգիայի: Ամենից շատ տարերքից տուժել է Փարիզից հարավ-արեւելք գտնվող Նեմուր քաղաքը, որտեղից երեք հազար մարդ է տարհանվել: Քաղաքով հոսող Լուեն գետը՝ Սենի վտակը, հասել է մի մակարդակի, որպիսին չեն տեսել 1910 թվականի ավերիչ հեղեղման ժամանակներից: «Քաղաքի կենտրոնական շրջանն ամբողջովին ջրի տակ է: Բոլոր ձեռնարկություններն ավերված են»,- ասել է Նեմուրի քաղաքագլուխ Վալերի Լակրուտը:

Տեղատարափ անձրևները մոլեգնել են նաեւ Գերմանիայում, որտեղ առնվազն տասը մարդ է զոհվել: «Մենք սգում ենք այն մարդկանց համար, որոնց օգնությունը չափազանց ուշ հասավ և նրանք զոհվեցինք հեղեղման հետեւանքով»,- ասել է Գերմանիայի կանցլեր Անգելա Մերկելը:

Հորդառատ անձրևներ են տեղացել նաև Բելգիայում: Բազմաթիվ քաղաքներ, այդ թվում՝ Անտվերպենը, Լիմբուրգը և Լիեժը, տուժել են հեղեղումից: