Ի՞նչ բացատրություն ունեն ՀՀ վարչապետն ու էկոնոմիկայի նախարարը

Հայաստանում այս տարվա առաջին կիսամյակում 2015թ. առաջին վեց ամիսների համեմատ նվազել է կենցաղային ժամացույցների արտադրությունը. եթե նախորդ տարվա նշված ժամանակաընթացքում արտադրվել է 7436 հատ կենցաղային ժամացույց, ապա 2016թ. հունվար-հունիսին ընդամենը՝ 5611 հատ:

Լուրեր.com-ը ՀՀ ազգային վիճակագրական ծառայությունից տեղեկացավ նաև, որ ավտոմոբիլային մարտկոցների արտադրությունը նույնպես նվազել է. նախորդ տարվա առաջին կիսամյակին արտադրվել է 14 921 ավտոմոբիլային մարտկոց, 2016թ. հունվար-հունիսին ընդամենը՝ 6846 հատ: Նույն ժամանակաընթացքում նվազել է նաև ավտոգենային սարքավորումների արտադրությունը. 2015թ. առաջին կիսամյակին դրանց արտադրությունը հասել է 14 000 հատի, այս տարվա 1-ին կիսամյակի ընթացքում արտադրվել է ընդամենը 11 100 հատ: Էլեկտրաեռակցման սարքավորումների արտադրությունը նույնպես նվազել է. եթե 2015-ի առաջին կիսամյակում արտադրվել է դրանցից 41 հատ, ապա այս տարի ընդամենը՝ 13 հատ:

Արտադրության անկումը շատ մեծ է նաև մետաղահատ գործիքների արտադրության բնագավառում. անցյալ տարվա հունվար-հունիսի 12 393 հատի դիմաց 2016թ. նույն ժամանակաընթացքում արտադրվել է ընդամենը 9822 հատ: Նվազումը մեծ չէ մինչև 0.75 կՎտ հզորության էլեկտրաշարժիչների արտադրության ցուցանիշների առումով. անցյալ տարվա 1-ին կիսամյակին դրանցից արտադրվել է 679 հատ, այս տարի' 665 հատ:

Վերոնշյալ արտադրական ցուցանիշների նվազման համար բացատրություն է պետք, այս կապակցությամբ ի՞նչ բացատրություն ունեն ՀՀ վարչապետն ու էկոնոմիկայի նախարարը: