Ադրբեջանում սնանկ է ճանաչվել ևս 2 բանկ

Բաքվի թիվ 1 վարչատնտեսական դատարանի որոշումով 2016 թվականի օգոստոսի 16-ից սնանկ են հայտարարվել Կովկասյան զարգացման բանկն ու Atrabank բանկը:

Այս մասին, ինչպես հաղորդում են ադրբեջանական ԶԼՄ-ները, ասվում է Ադրբեջանի ավանդների ապահովագրության հիմնադրամի կողմից այսօր տարածած հայտարարության մեջ:

«Թուրան» լրատվական գործակալությունն ավելի շուտ հաղորդել էր, որ Ադրբեջանի ֆինանսական շուկաների վերահսկողության պալատը հետ է կանչել երկրի ևս 4 բանկի լիցենզիաները, նշելով, որ դրանք Dekabank, Kredobank, Parabank և Zaminbank բանկերն են: Պալատի ղեկավար Ռուֆաթ Ասլանլըն հայտնել է, որ համապատասխան որոշումը կառույցն ընդունել է հուլիսի 21-ին: Բանկերի լիցենզիաները վերացնելու պատճառն այն է, որ «այդ բանկերի ակտիվները օրենսդրությանը համապատասխան կերպ դասակարգված չեն, նրանք չունեն անհրաժշետ ռեզերվներ, և միասնական կապիտալը չի համապատասխանում 50 մլն մանաթի չափով նվազագույն պահանջներին, ասել է Ասլանլըն:

Հիշյալ բանկերում աշխատում էր 450 մարդ, և հուլիսի 22-ից այնտեղ ժամանակավոր ադմինիստրատորներ են նշանակվել: