Մտավոր սեփականության վարկանիշով Ադրբեջանը հետ է անգամ Մոզամբիկից

ՄԱԿ-ի Մտավոր սեփականության համաշխարհային կազմակերպության (WIPO) կողմից ամեն տարի հրապարակվող Գլոբալ ինովացիայի ինդեքսում Ադրբեջանը հետ է անգամ Մոզամբիկից: Այդ վարկանիշը որոշվում է պատենտ ստանալու համար երկրի 1 մլն բնակչի հաշվով դիմումների թվով:

Վարկանիշում բարձր տեղեր զբաղեցրած երկրների համար բնութագրական է ինովացիոն տնտեսության համար լավ ենթակառուցվածքը, ինչպես նաեւ մարդկային կապիտալի համար ներդրում կատարելու ցանկությունը:

WIPO-ն հրապարակել է 2016 թվականին ինովացիոն վարկանիշի բնագավառում 128 երկրների վարկանիշը, որում Ադրբեջանը նշված է 85-րդ տեղում:

«Ազադլըգ» թերթն այդ առնչությամբ գրել է, որ Ադրբեջանը վարկանիշում հետ է ոչ միայն իր բոլոր հարեւան, այլ նույնիսկ աֆրիկյան Մոզամբիկ, Քենիա, Ռուանդա, Մարոկո երկրներից:

Վարկանիշում Հայաստանը զբաղեցրել է 60-րդ, Վրաստանը' 64-րդ, Իրանը' 78-րդ, Թուրքիան' 42-րդ, Ռուսաստանը' 43-րդ տեղը:2016 թվականի WIPO-ի վարկանիշում առաջին տեղերում են Շվեյցարիան, Շվեդիան, Մեծ Բրիտանիան, ԱՄՆ-ը, Ֆինլյանդիան եւ Սինգապուրը: