Թուրքիան կապեր ունի մերձավորարևելյան իսլամիստների հետ. Գերմանիա

Մերձավոր արեւելյան իսլամիստների եւ ահաբեկչական կազմակերպությունների հետ Թուրքիայի հնարավոր կապերի վերաբերյալ Գերմանիայի կառավարության գնահատականը հեռու չէ իրականությունից:

Նման հայտարարությամբ Գերմանիայի դաշնային հանրապետության ներքին գործերի նախարար Թոմաս դե Մեզյերը այսօր հանդես է եկել գերմանական ARD հեռուստաալիքի եթերով:

ԶԼՄ-ներ թափանցած տեղեկությունների համաձայն՝ պաշտոնական Բեռլինը գտնում է, որ Անկարան գիտակցաբար համագործակցում է ահաբեկչական խմբավորումների հետ: ԳԴՀ-ն Թուրքիան համարում է «Մերձավոր եւ Միջին Արեւելքի տարածաշրջանում իսլամիստական խմբավորումների գործողությունների համար կենտրոնական հարթակ»: Նման ձեւակերպում է առկա խորհրդարանական Ձախ կուսակցության հարցապնդմանը գերմանական կառավարության տված պատասխանում, երեքշաբթի հայտնել է ARD-ն:

«Այն, ինչ նշվել էր խորհրդապահության պայմաններում, հանդիսանում է թուրքական իրականության տեսակետներից մեկի ընդգծված վկայություն», -այդ արտահոսքը ԶԼՄ-ներին մեկնաբանել է դե Մեյզերը:

ԳԴՀ կառավարության մամուլի ասուլիսի ընթացքում հայտնի է դարձել, որ Ձախ կուսակցության համար պատասխանը գերմանական հետախուզության տվյալների հիման վրա ձեւակերպել են ՆԳՆ աշխատակիցները:

Հրահանգի համաձայն՝ խորհրդարանականներին պատասխան ուղարկելուց առաջ, նրանք պետք է տեքստը համաձայնեցնեին արտաքին գործերի նախարարության հետ, բայց դա չեն արել: