Հարավային Սուդանում 16 հազար երեխաներ են մասնակցում զինված հակամարտությանը. ՅՈՒՆԻՍԵՖ

Հարավային Սուդանում շարունակում են զինվորագրել երեխաներին, միայն այս տարվա սկզբից զինված խմբերի շարքերում հավաքագրվել են ավելի քան 650 երեխաներ, ընդամենը 2013 թվականի վերջից 16 հազար անչափահասներ զենք են վերցրել իրենց ձեռքը: Այդ մասին հայտարարել են ՄԱԿ-ի մանկական հիմնադրամում:

ՅՈՒՆԻՍԵՖ-ում զգուշանում են, որ երկրում բախումների վերսկսումն սպառնում է տասնյակ հազարավոր երեխաների:

Ընդամենը, կազմակերպության տվյալներով, շուրջ 16 հազար երեխաներ են զենք վերցրել 2013 թվականի դեկտեմբերից, երբ հանրապետությունում սկսվեցին առաջին ընդգրկուն բախումները: 2015 թվականին երկրում տեղի ունեցավ խոշոր զորացրում, որի ընթացքում բաց թողեցին 1775 երեխաների:

«Բախումների եւ զինված ուժերի շարքերում հավաքագրման վերսկսումը կարող է վիժեցնել այդ գործընթացը Հարավային Սուդանում»,- ասված է ՅՈՒՆԻՍԵՖ-ի հայտարարության մեջ:

Հուլիսի սկզբին՝ Հարավային Սուդանի անկախության հինգերորդ տարեդարձի նախօրեին, մայրաքաղաք Ջուբայում վերսկսվել են մարտերը կառավարական զորքերի եւ ընդդիմության միջեւ:

ՅՈՒՆԻՍԵՖ-ում նաեւ նշում են, որ աշխարհի ամենաերիտասարդ երկրում ներկայիս ճգնաժամի պայմաններում սաստկացել է բռնությունը կանանց ու աղջիկների նկատմամբ: 2013 թվականից երկրում շուրջ 900 հազար երեխաներ ներքին վերաբնակներ են դարձել: Նրանցից 250 հազարն անհրաժեշտ սնունդ չի ստանում, երկրում երեխաների կեսից ավելին դպրոց չի հաճախում, հաղորդել է ՌԻԱ Նովոստին:

Լուսանկարը' Reuters