Հայաստանի նման փոքր երկրի համար սենսացիա ենք գրանցել. փոխչեմպիոն ծանրորդները Օլիմպիական խաղերի մասին

Ռիո դը Ժանեյրոյում կայացած Օլիմպիական խաղերի փոխչեմպիոններ Գոռ Մինասյանն ու Սիմոն Մարտիրոսյանը, ծանրամարտի Հայաստանի հավաքականի գլխավոր մարզիչ Փաշիկ Ալավերդյանը հյուրընկալվել էին «Սպուտնիկ Արմենիա» մամուլի կենտրոնում: Մարզիկները կիսվեցին առաջին տպավորություններով:

Սիմոն Մարտիրոսյան. «Ընտանիքի միակ որդին եմ, շատ են ուրախացել: Էջմիածնում ևս ջերմ ընդունելություն արժանացա, մեդալ նվիրեցին ինձ: Դեռևս միայն հորեղբորս կողմից եմ նվեր ստացել, պետական պարգև դեռ չեմ ստացել»:

Գոռ Մինասյան. «Տպավորությունները շատ լավ ու վառ են: Երկար էինք պատրաստվել այս Օլիմպիադային, շատ աշխատանք է կատարվել: Արդարացրել ենք ազգի, ղեկավարության, մարզիչների հույսերը: Ուրախ ենք, որ Հայաստանի դրոշն ենք բարձրացրել Օլիմպիական խաղերում: Հայաստանի նման փոքր երկրի համար սենսացիա ենք գրանցել»:

Գոռ Մինասյանն անդրադարձավ այն լուրին, ըստ որի՝ ՀԱՕԿ նախագահ Գագիկ Ծառուկյանի կողմից 4-սենյականոց բնակարան է նվեր ստացել.

«Պետք չէ շահարկել նվեր բառը: Այդ բնակարանը ստացել եմ իմ արդյունքների համար: Ես Հայաստանի համար քիչ բան չեմ արել՝ Օլիմպիական խաղերի արծաթե մեդալակիր եմ դարձել և կարծում եմ՝ արժանացել եմ»:

Սիմոն Մարտիրոսյանը հերքեց այն, որ մարզադպրոցում, որտեղ ինքը պարապմունքներ է անցկացնում, անմխիթար վիճակ է տիրում: Լրագրողի պնդմանը, որ կառույցում անվադողեր են վառում ջերմությունն ապահովելու համար, Սիմոնը հակադարձեց՝ նշելով, որ դա տարիներ առաջ էր: Փաշիկ Ալավերդյանը հայտնեց, որ այդ մարզադպրոցը համալրվել է բարձրակարգ ծանրաձողերով («Eleiko»), որոնք առաջատարն են իրենց տեսակի մեջ:

Անդրադառնալով մարզադպրոցների խնդրին՝ Ալավերդյանն ասաց.

«Կան երկրներ, որտեղ պայմաններն ավելի վատ են: Ի՞նչ է, մեր բոլոր թատրոնները բարվոք վիճակում են...: Այս ոլորտում էլ ամեն ինչ համապատասխան է երկրի վիճակին: Մենք հավաքներ ենք անցկացնում Ծաղկաձորի, Աբովյանի հիանալի մարզադահլիճներում, մեծ սպասելիքներ ունենք նաև Օլիմպավանի դահլիճից»:

Աղբյուրը՝ armsport.am