Ռաֆիկ Գրիգորյանի պատասխանը` Սևանի քաղաքապետին

Ստորև ներկայացված է ՀՀ Գեղաքունիքի մարզի մարզպետ Ռաֆիկ Գրիգորյանի պատասխանը Սևանի քաղաքապետին.

Ես այսօր առավոտյան կարդացի Սևանի քաղաքապետի հարցազրույցը և չեմ կարող չարձագանքել դրան:

Չնայած, որ իմ պատվից ցածր եմ համարում նման «պաշտոնյային» արձագանքելը, բայց չեմ կարող անտեսել սևանցիների և մյուս ընթերցողների կարծիքը:Սևանցիները մեկ անձով չեն ներկայացվում, ուստի հարկ եմ համարում ձեզ հետ կիսվել որոշ տեղեկություններով: Ի՞նչն է նրան ստիպել ափերից դուրս գալ, որի մասին քաջատեղյակ են և՛ նրան ճանաչողները, և՛ սևանցիները:

Քաղաքապետը երջանիկ մոլորության մեջ է, հայտարարելով, թե իբր ես իր մոտ գյուղապետ եմ աշխատել։ Նա լինելով համայնքի ղեկավար, թերևս անգամ պատկերացում չունի իր իրավասությունների մասին: Եթե իրավիճակն այնպիսին լիներ, ինչպես ինքն է պատկերացնում, ապա ես իրեն անմիջապես կհեռացնեի աշխատանքից։ Կարծում եմ, որ ողջ Սևանը գիտի, թե ինչպես է նա համայնքի ղեկավար ընտրվել, բայց ի տարբերություն նրա, ես աշխատում էի արտերկրում և այդ ընթացքում արդեն ընտրվեցի համայնքի ղեկավար ու եկա աշխատելու՝ գիտակցելով, որ համայնքի ղեկավարի պաշտոնը ծառայություն է և ոչ թե իրավունք: Ցավոք միայն նրա փոքր ուղեղում կարող էր միտք առաջանալ, որ արտերկրում բնակվող մեր մոտ 7 մլն հայրենակիցները խոպանչիներ են։

Բոլորը տեղյակ են, թե համայնքում իմ պաշտոնավարման 3 տարիների ընթացքում ինչ աշխատանքներ են կատարվել, երբ չկար պետական որևէ տեսակի ֆինանսավորում, իմ ողջ գործունեության ընթացքում երբևէ օրենքի հետ հակասության մեջ չեմ մտել:Իսկ ինքն իր աշխատանքային գործունեության ընթացքում տարբեր քրեական գործերով է անցել և փորձում է իր այդ գործելաոճը շարունակել նաև իմ մարզպետ աշխատած տարիներին, որը ես թույլ չտվեցի: Իմ լիազորությունների շրջանակում, վարչական վերահսկողության ընթացքում բացահայտվեցին տարբեր տեսակի խախտումներ:

Թերևս մեկ օրինակը բավական է նրա գործունեության մասին պատկերացում կազմելու համար: Պետական միջոցներից համայնքին տրվող ֆինանսական միջոցները, որոնք պետք է ծախսվեին կոնկրետ ուղղվածությամբ, այլ տեղ են գնացել, իր ոճին համապատասխան:

Այս ծրագրերի ֆինանսավորումն իմ լիազորությունների շրջանակներում դադարեցվել է: Նա իր գործունեության մոտ չորս տարիների ընթացքում, երբ որ համայնքը ֆինանսավորվել է այս կամ այն ծրագիրն իրականացնելու համար, անմիջապես տեղական հեռուստաընկերություններով փորձել է վերագրելիրեն: Մինչդեռ ՀՀ նախագահի նախընտրական ծրագրով նախատեսված մարզերի համաչափ զարգացման նպատակին են ուղղվել դրանք, ընդ որում նման ծրագրերը միայն Սևան քաղաքին չեն տրամադրվել, այլ մարզին և մյուս համայնքներին, ինչպես նաև հանրապետության այլ մարզերին:Ես համոզված եմ, որ իրավապահ մարմինները կարձագանքեն և ես կներկայացնեմ վարչական վերահսկողության ընթացքում կազմված արձանագրությունը, և առանձին տեղեկանք կտրամադրեմ այլ խախտումների վերաբերյալ:Սևանցիները և հասարակությունը կտեղեկանան «ինքնագոհ քաղաքապետի» գործունեությունից:

Կարծում եմ ասվածը բավական է ընթերցողներին կարծիք կազմելու համար, իսկ ինչ վերաբերվում է իմ և իր հարաբերությունների հետագա ընթացքին, ապա ես համոզված եմ, որ նա ինձ լավ է ճանաչում:Իմ զբաղեցրած պաշտոնը թույլ չի տալիս իջնել իր մակարդակին, իսկ մնացածի պատասխանն արդեն կտա ժամանակը: