«Կարծում եմ՝ խնդիրն իրավական դաշտում է…». Գագիկ Մելիքյան

Ինչպես արդեն հայտնել է ԼՈՒՐԵՐ.com-ը, երեկ՝ ժամը 17:30-ի սահմաններում, Երևանի «Արմենիա Մարիոթ» հյուրանոցում Սյունիքի մարզպետ Սուրեն Խաչատրյանը ծեծի էր ենթարկել գործարար Սիլվա Համբարձումյանին: 

Այս մասին այսօր տեղի ունեցած ասուլիսի ժամանակ խոսեց ԱԺ պատգամավոր Գագիկ Մելիքյանը։

«Ասեմ, որ ես այդ մասին տեղեկացել եմ մամուլից։ Իհարկե՝ նման բանն անընդունելի է, բայց համոզված չեմ նաև, որ դա տեղի է ունեցել, քանի որ տեղյակ եմ նաև, որ մարզպետի մամուլի խոսնակն այդ մասին հերքում է հրապարակել։ Կարծում եմ, որ խնդիրն իրավական դաշտում է, նրանք պետք է պարզեն տեղի ունեցածը»,– ասաց Մելիքյանը։

Լրագրողների հարցին, թե չի՞ կարող կրկնվել արդյոք Բեգլարյանի դեպքը, երբ իրավական դաշտում ոչ մի քննարկում էլ չեղավ ու հաջորդ օրը ներկայացվեց հրաժարականի դիմում, Գագիկ Մելիքյանը պատասխանեց. «Ես այսօր խոսել եմ ձեր թվարկած ականատեսներից մեկի՝ Խաչիկ Մանուկյանի հետ, և նա հերքել է դա»։ Սակայն լրագրողները տեղեկացրեցին, որ Մանուկյանը խոստովանել է, որ դեպքն եղել է իրականում, ինչին ԱԺ պատգամավորը հորդորեց. «Դուք կարող եք այդ մասին հայտնել իրավապահ մարմիններին»։