Նոր բան մտածեք...

Վարչապետի՝ դեպի մարզեր այցերի մասին տեղեկատվությունը կրկին  հույսեր արթնացրեց հասարակության որոշակի շրջանակներում: Նախ, այս քայլով Կառավարության ղեկավարը ցույց տվեց, որ Հանրապետական կուսակցությունը չի պատրաստվում ընտրություններում բարեհաջող մասնակցությունից հետո դադար վերցնել: Իհարկե, ՀՀԿ-ի հավատարիմ  «ընտրազանգվածը» նման գործելաոճ ակնկալում է նաև մյուս բոլոր թեկնածուներից, ամեն դեպքում, նրանց արձագանքն ակնհայտ կերպով ի նպաստ վարչապետական իմիջի բարձրացմանն էր: 

Վարչապետն, ինչպես միշտ, այցերը սկսեց գաղտնի խորհրդակցություններով, ինչը, անշուշտ, չենք կարող բացասաբար դիտարկել, այնուհետեև, արդեն լրագրողների ներկայությամբ կայացած նիստերի ժամանակ՝ շատ խիստ նկատողություններով աչքի ընկավ իր ենթակա-գործընկերների նկատմամբ, ինչը ևս փաստում է, որ ժողովրդի համակրանքը ոչ թե Կարապետյանի  քրտնաջան աշխատանքի արդյունքն է, այլ իր այդ քայլերն են ուղղված վերոնշյալ համակրանքը ձեռք բերելուն:

Շատ կարևոր է այն հանգամանքը, որ այս այցերի ժամանակ Կառավարության ղեկավարը ոչ մի անգամ առերես հանդիպում չունեցավ ժողովրդի հետ, և դժվար չէ կռահել, թե ինչու. մի՞թե նախընտրական քարոզարշավում  կոնկրետ առարկայական խոստումներից զերծ մնացած քաղաքական ուժը ընտրություններից առաջ և հետո, ամենաքիչը 1 տարվա կտրվածքով՝ խնդիր ունի որևէ գլոբալ արդյունք ցույց տալու, իհարկե՝ ոչ, ահա՛ թե որտեղ է թաքնված քաղաքացու նկատմաբ նման արհամարհական վերաբերմունքի բացատրությունը:

Հասարակության ականջը հոգնել է «կանենք», «կմտածենք-կասենք», «հանձնարարել եմ», «գիտենք», «զբաղվում ենք» եւ նմանատիպ վարչապետական լեքսիկոնից: Ի դեպ՝ նման կերպ կառավարությունը վարվում է իր անդամների հետ. դրա մասին է վկայում Կարեն Կարապետյանի հրահանգին ի պատասխան՝ Շիրակի նորընծա մարզպետի 10 ներդրումային ծրագրերի մերժումն առանց որևէ պատճառաբանության:

Իսկ ի՞նչ ասել՝ լռե՞լ, իսկ դա ի՞նչ օգուտ կտա սին խոստումերով հուսալքության պատնեշը հաղթահարելու՝ հասարակության պատրաստակամությանը, բնականաբար՝ ոչինչ, բացի դժգոհությունների առիթից: Պետք է ուղղակի հետամուտ լինել գոնե չնչին խոստումներին, կամ էլ նոր բան է պետք մտածել. այս մեթոդն արդեն իրեն սպառել է:

Վաչիկ Գրիգորյան