Որքա՞ն է վճարել Պուտինը Ալիևի լոբբինգի համար. նոր հարված Հայաստանին

Համաշխարհային մամուլում հրապարակվել են Ալիեւի վարչակազմի կոռուպցիոն նոր բացահայտումներ, ըստ որոնց՝ մոտ 3 միլիարդ դոլար է վճարվել Ալիեւի լոբբինգի, բարձրաստիճան պաշտոնյաների, լրագրողների «գնելու» համար: Այդ խողովակներից մեկը Ռուսաստանի հպարտությունն է՝ «Ռոսօբորոնէքսպորտ» ռազմարդյունաբերական համալիրը: Այսինքն, Ռուսաստանը եւ Ադրբեջանը Հայաստանի դեմ գործել են մի քանի ճակատով, այդ թվում՝ նաեւ Հայաստանի շահերի դեմ միջազգային լոբբինգ ֆինանսավորելով:

Ընդհանրապես, տպավորությունն այնպիսին է, որ Ռուսաստանը նժարը կտրուկ թեքել է Ադրբեջանի կողմը՝ անելանելի իրավիճակ ստեղծելով Հայաստանի համար, ու երևի ժամանակն է, որ Հայաստանը սիրո այլ առարկաներ էլ որոնի տարածաշրջանում՝ ի դեմս, օրինակ, Իրանի կամ Չինաստանի: Միջազգային այդ բացահայտումները նոր հնարավորություն են ընձեռում Հայաստանին՝ մանևրելու ինչպես Արցախյան հակամարտության կարգավորման բանակցություններում, այնպես էլ ՌԴ հետ երկկողմ հարաբերություններում: Երբ իրեն դաշնակից համարող պետությունը ոչ միայն զինում է քո թշնամուն, այլ նաև բազմակողմանի աջակցում հանրային հարթակներում քո դեմ վարվող տեղեկատվական փոքր և մեծ պատերազմներին, ժամանակն է դուրս գալ քաղաքական անմեղսունակության թմբիրից և տվյալ խնդիրը բարձրաձայնել միջազգային մակարդակով: Հայկական կողմը կարող է պահանջել ՄԱԿ-ից՝ սանկցիաներ սահմանել հակամարտության գոտում զենք վաճառող երկրների դեմ:: Ակնհայտ է, որ այդ արգելանքին դեմ է Ռուսաստանը, այսինքն՝ Մոսկվան է միայն, որ չի համաձայնում արգելանքի գաղափարին: Դա արձանագրելը բավականին դյուրին է, քանի որ միայն Ռուսաստանն է համանախագահ եռյակի երկրներից Ադրբեջանին զենք վաճառողը: Ռուսաստանը ղարաբաղյան հակամարտության գոտում զենքի հիմնական մատակարարն է եւ զինված դիմակայության գլխավոր շահառուն, որը հնարավորություն է տալիս նրան «զենքի բիզնես» անել:

Ստելլա Խաչատրյան