Խնդիրն ավելի գլոբալ է. Կոստանյան

Այսօրվա ԱԺ նիստում պատգամավորների կողմից քննարկվում է Քննիչ հանձնաժողով ստեղծելու մասին նախաձեռնությունը։ Հանձնաժողով ստեղծելու մասին որոշման նախագիծը խորհրդարանին ներկայացրեց ԱԺ պետա-իրավական և մարդու իրավունքների պաշտպանության հարցերի մշտական հանձնաժողովի նախագահ Գևորգ Կոստանյանը, որը նշեց՝ հանձնաժողով ստեղծելու անհրաժեշտությունը պայմանավորված է ԱԱԾ և ՀՔԾ ղեկավարների մասնակցությամբ հրապարակված ձայնագրությամբ:

«Քննիչ հանձնաժողովի ստեղծման հիմքում դրել ենք ոչ թե կոնկրետ հանգամանքը կամ կոնկրետ հարաբերությունները,  այլ խնդիրն ավելի գլոբալ է, որովհետև այդ հանգամանքը ինձ և մեզ, յուրաքանչյուրիս համար հիմնավոր կասկածներ է ստեղծում առ այն, որ եթե ԱԱԾ տնօրենի ու ՀՔԾ պետի խոսակցությունները ձայնագրվում են: Դա նշանակում է, որ Սահմանադրությամբ և Եվրոպական կոնվենցիայով երաշխավորված յուրաքանչյուր անձի հեռախոսային խոսակցությունների ու հաղորդումների գաղտնիության սկզբունքն առնվազն վտանգված է»,-նշեց Կոստանյանը՝ հավելելով, որ պետք է իրենք վստահ լինեն, որ Հայաստանի հասարակության մեջ կան բոլոր հնարավորությունները՝ երաշխավորելու յուրաքանչյուր անձի հեռախոսային խոսակցությունների գաղտնիության իրավունքը։

Կոստանյանը նշեց, որ խոսակցության բովանդակային կոնտեքստում տեսնում են ներգրավվածություն, որը չպետք է տեղի ունենար արդարադատության իրականացման գործընթացում։ 

«Արդյո՞ք Հայաստանում պաշտպանված է յուրաքանչյուր անձի արդար դատաքննություն իրավունքը», ասաց Կոստանյանը՝ նշելով, որ չեն անդրադառնալու հարուցված քրեական գործի հանգամանքներին, կամ խոսակցության բովանդակությունը, որովհետև սա այլ քննարկման առարկա է։