Գեղամասար խոշորացված համայնքում կավելանան աշնանացանի նախորդ տարվա ծավալները

Գեղարքունիքի մարզի Գեղամասար խոշորացված համայնքում արդեն մեկնարկել են աշնանացանի աշխատանքները: Ինչպես «Արմենպրես»-ին տեղեկացրին Գեղամասարի համայնքապետարանի աշխատակազմից, սեպտեմբերի 13-ի դրությամբ՝ համայնքի բնակավայրերում կատարվել է շուրջ 250 հեկտար աշնանացան ցորենի ցանք: Նախորդ տարի Գեղամասար համայնքի կազմում ընդգրկված 18 համայնքներում կատարվել է 4166,5 հեկտար աշնանացան: Սեպտեմբերի առաջին տասնօրյակի դրությամբ՝ ցորենի բերքահավաքն ավարտվել է ամբողջությամբ: Մեկ հեկտարի միջին բերքատվությունը կազմել է 22 ցենտներ:
«Այս պահին հողը կոշտացած է, դժվար է վարվում, ուստի, տնտեսությունները սպասում են խոնավ եղանակների, որպեսզի ավելի բարենպաստ պայմաններում կատարեն ցանքը: Տնտեսություններն ունեն բավարար քանակի սերմացու, տեխնիկան բավարար է՝ աշնանացանը կազմակերպելու եւ կատարելու համար: Կարծում եմ, որ նախորդ տարվա աշնանացանի ծավալները ոչ միայն կպահպանվեն, այլ նաեւ որոշակիորեն կավելանան: Այս տարի ունեցել ենք 3343,3 հեկտար գարնանացան գարու ցանքեր, որոնց միջին բերքատվությունը կազմել է 18 ցենտներ: Բնական է, որ տնտեսությունները կգերադասեն աշնանացանը: Ունենք նաեւ 1025,2 հեկտար կարտոֆիլի ցանք, որի բերքահավաքը կսկսվի սեպտեմբերի վերջերից եւ կավարտվի հոկտեմբերի ընթացքում: Կարտոֆիլի դաշտերը բերքահավաքից անմիջապես հետո գրեթե ամբողջությամբ կդրվեն աշնանացան ցորենի ցանքի տակ՝ ցանքաշրջանառություն կիրառելու նպատակով»,- ներկայացրեց Գեղամասարի համայնքապետարանի հողաշինարար, առաջատար մասնագետ Միքայել Հայրապետյանը:
Նույն աղբյուրի համաձայն՝ այս տարի Գեղամասարում ցանվել է 128 հեկտար բանջարաբոստանային մշակաբույս:

Խոսրով Խլղաթյան