Փամբակի եւ Արեգունու տնտեսությունները եկող տարում ոռոգման ջրի խնդիր չեն ունենա

Գեղարքունիքի մարզի Գեղամասար համայնքի Փամբակ եւ Արեգունի գյուղերում մեկնարկել են ոռոգման արտաքին ցանցերի հիմնանորոգման աշխատանքները: Ինչպես «Արմենպրես»-ին տեղեկացրեց Գեղամասար համայնքի ղեկավար Հակոբ Ավետյանը, Փամբակում օգոստոսի վերջերից հիմնանորոգվում է 400 միլիմետր տրամագծով երկաթյա խողովակաշարը, որի առանձին հատվածներ շարքից դուրս են եկել, որոշ հատվածներում էլ կորուստները հասնում են մեծ չափերի: Ծրագրի արժեքը կազմում է 6 միլիոն 642 հազար դրամ, որից 5 միլիոն 942 հազար դրամը ներդրել է «Շեն» հիմնադրամը, 700 հազար դրամը՝ Գեղամասարի գյուղապետարանը: Շինարարական աշխատանքների ավարտի ժամկետ է սահմանված 2018 թվականի հոկտեմբերի 30-ը, սակայն, ինչպես վստահեցնում են շինարարները, հիմնանորոգումը կավարտվի ժամկետից շուտ:

«Այս ծրագրի իրականացման արդյունքում ոռոգման ջրով կապահովվեն Փամբակ գյուղի բոլոր 195 տնտեսությունները: Փոխվում են խողովակաշարի բոլոր վնասված մասերը, կառուցվում են ջրբաժաններ: Ոռոգման ջրատարի արտաքին ցանցի կորուստները հիմնովին կկրճատվեն, եւ գյուղի տնտեսություններն այլեւս ոռոգման շրջանում որեւէ դժվարություն չեն ունենա»,- ներկայացրեց համայնքի ղեկավար Հակոբ Ավետյանը:
Մի քանի օրից ոռոգման ջրատարի արտաքին ցանցի հիմնանորոգման աշխատանքների մեկնարկը տրվելու է նաեւ նույն համայնքի Արեգունի գյուղում: Ծրագրի ընդհանուր արժեքը կազմում է 5 միլիոն 980 հազար դրամ, որից 3 միլիոնը ներդրել է «Ջինիշյան հիշատակի հիմնադրամը», 2,7 միլիոն դրամ՝ «Շեն» բարեգործական-հասարակական կազմակերպությունը եւ 250 հազար դրամ՝ Գեղամասարի գյուղապետարանը:

«Հիմնանորոգվող ոռոգման ջրատարի  ընդհանուր երկարությունը կազմում է 2,7 կիլոմետր: Նորոգվում են բետոնյա կիսախողովակների վնասված հատվածներ, առավել շատ վնասված հատվածներում տեղադրվում են նոր կիսախողովակներ, կառուցվում են բաժանարարներ: Արեգունիում եւս հիմնանորոգման աշխատանքները կավարտվեն այս աշնան ընթացքում, իսկ եկող ամռանը ոռոգման ջրով կապահովվեն գյուղի բոլոր 120 տնտեսությունների տնամերձերը եւ եւս 2 հեկտար գյուղատնտեսական նշանակության հողատարածք: Երկու գյուղերի համար էլ կենսական կարեւոր նշանակության խնդիր է լուծվում, ինչի արդյունքում տնտեսությունները գյուղմթերքների արտադրությունն ավելացնելու հնարավորություն են ստանում»,- հավաստեց համայնքի ղեկավարը:

Խոսրով Խլղաթյան