Հները, թե՞ նորերը. ո՞ր կառավարությունն է ավելի շատ դրամաշնորհ ստացել

Վերլուծական 11 Հունվար, 2020 20:00

Հեղափոխությունից հետո, 2018 թվականին ՀՀ կառավարությունը օտարերկրյա պետություններից և միջազգային կազմակերպություններից ստացավ, ընդհանուր առմամբ, 35,8 միլիարդ դրամի (74 միլիոն դոլարի) դրամաշնորհներ: Այս ցուցանիշը 4,8 միլիարդ դոլարով գերազանցում էր 2017 թվականի ցուցանիշը՝ կազմելով պետական բյուջեի եկամուտների 3 տոկոսը: Ինչպես 2016 և 2017 թվականներին, 2018-ին ևս Հայաստանի ամենամեծ դոնորներներն էին Եվրամիության կազմակերպությունները: Ընդ որում, ԵՄ կազմակերպությունները միակն են, որոնք Եվրոպական հարևանության ծրագրի շրջանակներում տրամադրում են բյուջեի աջակցման ընդհանուր բնույթի պաշտոնական դրամաշնորհներ, որոնք հասնում են 6.5 միլիարդ դրամի: Ինքնին դրամաշնորհ ստանալու մեջ որևէ հանցանք չկա, սակայն խնդիրը կայանում է նրանում, որ ընդդիմադիր Փաշինյանը շատ հաճախ էր մեղադրում իշխանություններին, մասնավորապես նախորդ կառավարության ղեկավար Կարեն Կարապետյանին, որ վերջինիս կառավարությունը նստեցրել է երկիրը գրանտային ասեղի վրա: Փաստացի, եթե դա, ըստ Փաշինյանի, բացասական տենդենց էր, ապա այսօր այդ տենդենցը խորացել է:

Եթե նախկին տրանսպորտի նախարարը ԵՄ-ից 5 միլիոն էր ստանում ճանապարհային անվտանգության բարձրացման համար, ապա այսօր էլ Եվրոպական ներդրումային բանկը նույն նպատակով տրամադրում է նույնչափ գումար: Այդ ծրագիրը ներառում է նաև Եվրոպական հանձնաժողովի կողմից մինչև 650 000 եվրոյին համարժեք գումարի չափով լրացուցիչ տեխնիկական աջակցության դրամաշնորհ և 200 000 եվրոյին համարժեք բյուջետային հատկացում՝ ԵՄ հաղորդակցության միջոցառումների, մասնավորապես` Հայաստանի ճանապարհային անվտանգության բարելավման ծրագրի համատեքստում վարքագծային ազդեցության համար հաղորդակցման (COMBI) ռազմավարության իրականացման համար։ Առողջապահության նախարարությունը իր հերթին 294 հազար եվրոյի դրամաշնորհ է ստացել չարաբաստիկ Գարդասիլը Հայաստան բերելու և գովազդելու դիմաց: Սակայն , նշենք, որ նախկին նախարար Լևոն Ալթունյանը ևս հետ չէր մնացել և նրա կառավարման շրջանում էլ նախարությունը շուրջ 170 հազար եվրո էր ստացել նույն դեղամիջոցը առաջ մղելու համար:

Ի՞նչ վիճակ է բնապահպանության ոլորտում: Ընդամենը վերջերս հայտնի դարձավ, որ Կովկասի բնության հիմնադրամը 2020 թվականին Հայաստանին կտրամադրի շուրջ 900․000 եվրո դրամաշնորհ։ Գումարը հիմնականում կուղղվի բնության հատուկ պահպանվող տարածքների աշխատակիցների աշխատավարձերի հավելավճարներին և այլ ընթացիկ ծախսերի համաֆինանսավորմանը։ Բացի այդ, ՄԱԿ-ի Հարմարվողականության հիմնադրամի 2019 թ.-ի մարտի 12-15-ը կայացած խորհրդի նիստում քննարկվել և հաստատվել է բնապահպանության նախարարության «Բնապահպանական ծրագրերի իրականացման գրասենյակ» պետական հիմնարկի կողմից ներկայացված «Հայաստանի բնության հատուկ պահպանվող տարածքներին հարակից համայնքների և էկոհամակարգերի հարմարվողականության ներուժի բարձրացում» 2,5 մլն ԱՄՆ դոլարի դրամաշնորհային ծրագիրը: Հարմարվողականության հիմնադրամի կողմից 2018 թ. հոկտեմբերին հաստատվել էր նաև «Արթիկ քաղաքի փակ քարհանքի թափոնների և ջրհեղեղների կառավարում» 1,43 մլն ԱՄՆ դոլար արժեքով ծրագիրը։ Ինչ վերաբերվում է նախորդ կառավարությանը, ապա 2017 թվականին Կովկասի Բնության Հիմնադրամից ստացվել է 5 միլիոն դրամի դրամաշնորհ, ԲՀՊՏ-ի համար հակահրդեհային սարքավորումներ ձեռք բերելու նպատակով: 2016-ին ՝ ԲՄՏՀ/SEIS Արևելք ծրագրի շրջանակում ԵՄ և Եվրոպական Բնապահպանական Գործակալության լավագույն պրակտիկային համապատասխան Շրջակա միջավայրի տեղեկատվական միասնական համակարգի ստեղծման նպատակով հատկացվել է 7 մլն. Եվրո բոլոր երկրների համար:

Սրանք առանձին ոլորտներով առանձին վերցրած օրինակներ են, որոնք, սակայն, ցույց են տալիս, որ մի հստակ պատասխանը չկա այն հարցին, թե որ կառավարությունն էր ավելի շատ նստած գրանտային ասեղի վրա…