Սեփական գրառումներն արագ ջնջող պատգամավորները և քաղաքական գործիչները

Վերլուծական 21 Հունվար, 2020 20:00

Նոր Հայաստանի պաշտոնյաների «նոու-հաուն» է դարձել սոցիալական ցանցերում գրառումներ անելն ու օպերատիվ կերպով դրանք հեռացնելը: Ընդ որում, տպավորություն է, որ հայրենի պաշտոնյաները յուրօրինակ մրցավազքի մեջ են մտել, թե ով դա առավել արագ կանի: Վերջիններս, սակայն, մոռանում են համացանցի կարևորագույն պատվիրաններից մեկը՝ այն ինչ մեկ անգամ գրվեց համացանցում, մնում է այնտեղ հավերժ:

Դիցուք՝ Ֆեսյբուքյան «ստատուսները» գրել-ջնջելու առաջին դեպքը արձանագրվեց 2018-ի նոյեմբերի 2-ին, երբ ՀՀ վարչապետի պաշտոնակատար Նիկոլ Փաշինյանի խորհրդական Մեսրոպ Առաքելյանը Facebook–ի իր էջում հետաքրքիր բովանդակությամբ գրառում կատարեց։ «Նորընտիր Ազգային Ժողովի առաջին նիստը և նոր վարչապետի նշանակումը տեղի է ունենալու դեկտեմբերի 31-ին: Նոր տարին նոր Հայաստանում», – գրել էր խորհրդականը։ Սակայն, մի քանի ժամ անց այդ գրառումը ջնջվեց Facebook–ից։

Այն բանից հետո, երբ ՍԴ շուրջ ծավալվող իրադարձությունների ֆոնին Նիկոլ Փաշինյանն իր գրառմամբ փորձեց հանրությանը համոզել՝ դատական համակարգի վրա քաղաքական իշխանությունների կողմից գործադրվող 0 ազդեցության մեջ, «փայլեց» իմքայլական պատգամավոր Հայկ Սարգսյանը: Վերջինս գրել էր՝ «Միմիայն ժողովրդի ստվար զանգվածը, նրա ահագնացող ցասումը և պատժի անխուսափելիությունը կստիպեն դատավորին արդար որոշում կայացնել: Այսօր ժամը 13:00 բոլորս դեպքի Նոր Նորքի դատարան»: Սակայն, քիչ անց պատգամավորը ջնջել է գրառումը, իսկ դրանից հետո կատարել նորը, որտեղ հայտնել է, որ շահարկումներից խուսափելու համար ինքն անձամբ չի պատրաստվում գնալ դատարան:

ԱԺ «Իմ քայլը» խմբակցության պատգամավոր Գևորգ Պապոյանն էլ այդ օրերին առաջարկում էր դասադուլ անել․ նա ֆեյսբուքյան իր էջում մասնավորապես գրել էր. «Հարգելի ուսանողներ, վաղը ոչ միայն չեմ լինելու ՀՊՏՀ-ում դասի, այլև առաջարկում եմ դասադուլ անել և միասին արգելափակել բոլոր դատարանների մուտքերը։ ՀԳ։ Դասերն անպայման լրացնելու ենք, սակայն հեղափոխության երկրորդ փուլից հետո»: Սակայն, նկատենք, որ քննադատությունների տարափից հետո վերջինս որոշել էր ջնջել գրառումը՝ այս անգամ գրելով, որ ԲՈՒՀ-երն ապաքաղաքական մարմին են և ակցիային մասնակցելն ու չմասնակցելը յուրաքանչյուրի իրավունքն է։

Տրանսպորտի, կապի, տեղեկատվական տեխնոլոգիաների նախկին փոխնախարար Արմեն Փամբուխչյանը Լարսը բաց պահելու յուրօրինակ մոտեցում էր ցուցաբերել։ Նա փոխել էր տերունականի աղոթքի բառերը՝ Լարսին դիտարկելով որպես Աստված։ Աղոթքի զորությունը դեռ չիմացած, փոխնախարարի պաշտոնակատարը ջնջել էր գրառումը, քանի որ այն քննադատությունների առիթ տվեց, Փամբուխչյանին մեղադրեցին «Հայր մեր»-ը ծաղրելու համար։

Հերթական դեպքը արձանագրվեց 2019-ի ապրիլի 30-ին, երբ համացանցում մի հետաքրքիր դրվագ տարածվեց Եվրասիական միջկառավարական խորհրդի նիստից, որում ՌԴ վարչապետ Դմիտրի Մեդվեդևը, ընդհատելով ՀՀ վարչապետ Նիկոլ Փաշինյանին, կատակեց, ինչը հարուցեց նիստի ներկաների ժպիտը։ Այս միջադեպի կապակցությամբ տարբեր շրջանակներ տարբեր գնահատականներ հնչեցրին։ Թե՛ Նիկոլ Փաշինյանի կողմնակիցները, թե՛ նրա ընդդիմադիրները դա որակեցին որպես ծաղրական վերաբերմունքի դրսևորում Նիկոլ Փաշինյանի նկատմամբ։ Տեղի ունեցածին և սոցիալական ցանցում տարածված քննարկումներին արձագանքեց անձամբ Նիկոլ Փաշինյանը՝ ֆեյսբուքյան գրառում կատարելով, որտեղ նշված էր. «Նոր մի պահ մտնում եմ ֆեյսբուք ու աչքերիս չեմ հավատում, որ կոռուպցիոն համակարգի մնացորդները այսքան հեշտությամբ կարող են փոթորիկ առաջացնել սոցիալական ցանցերում»:

Ուշագրավն այն է, որ մինչ Փաշինյանի գրառումը, գրառում էր կատարել ԱԺ փոխնախագահ Ալեն Սիմոնյանը: Նա, ֆեյսբուքյան էջում տեղադրելով Նիկոլ Փաշինյանի նկարը, գրել էր. «Դուխը հենց այն է, որ դու քեզ տիրապետում ես նույնիսկ այն ժամանակ, երբ քո դիմացինն անտակտ կատակ է անում` փորձելով ավելի լավը թվալ: Հասկացող մարդու համար ինքն իրեն դնում վատ վիճակի մեջ, իսկ դու իրեն օգնում ես այդ իրավիճակից դուրս գալ:Դուխը այն է, երբ դու քո «վիպենդրյոժը» կամ «լավ տղա» երևալը չես գերադասում երկրիցդ կամ քեզնից: Դուխը այն է, երբ քո հյուրի սխալը տեսնում ու ժպտում ես, քանզի վստահ ես ուժիդ և ինքդ քեզ վրա:Իսկ հետագան տեխնիկայի և ժամանակի հարց է»: Փաշինյանի գրառումից հետո Սիմոնյանը անհապաղ հեռացրեց իր գրառումը: Սիմոնյանի կողմից սեփական գրառումը ջնջելու վերջին դեպքը արձանագրվեց տառացիորեն երեկ, երբ վերջինս տեղադրել էր երրորդ նախագահ Սերժ Սարգսյանի լուսանկարը՝ արված ԱԱԾ նախկին տնօրեն Գեորգի Կուտոյանի հոգեհանգստի արարողության ժամանակ և այն մակագրել ՝ «ասում է ինձ հանգիստ թողեք»: Գրառումը ակնհայտ ծաղրական էր և օգտատերերի հորդորներից և մեկնաբանություններից հետո Սիմոնյանը այն հեռացրեց՝ քիչ անց կրկին հրապարակելով, ուղղելով միայն քերականական սխալները:

Ազգային ժողովի «Բարգավաճ Հայաստան» խմբակցության պատգամավոր Գևորգ Պետրոսյանի ֆեյսբուքյան էջն էլ վերջերս ապաակտիվացվել էր։ Մամուլում տեղեկության տարածվեց, որ պատգամավորի էջն ապաակտիվացել է նրա ֆեյսբուքյան գրառումներից մեկից հետո, որը պատգամավորը ջնջել է։ Գրառման մեջ, մասնավորապես, ասվում էր՝ «Սեռաշեղվածին պատվով հյուրընկալող, ոլորտը ձախողած, իր գործից բացարձակ անտեղյակ, գիտնականներին սովի մատնած ԿԳՄՍՉՊՋՌ նախարարը ստացել է մի քանի միլիոն դրամի աշխատավարձ ու պարգևավճար, իսկ սահմանը պահող պայմանագրային զինծառայողը վճարվել է մի քանի հազար դրամով (սա փաստ է, անհրաժեշտության դեպքում անուն ազգանունով կհրապարակեմ)... Սա՞ է արդարությունը, սա՞ էր «հեղափոխության» ամբողջ հմայքը...»:

Գրել-ջնջելու հետ մեծ սեր ունեն նաև Երևանի քաղաքապետարանում: Մասնավորապես Երևանի քաղաքապետ Հայկ Մարությանի մամուլի խոսնակ Հակոբ Կարապետյանը բանավոր նկատողություն էր ստացել «խնչած ունեմ» արտահայտության համար: «Բազմապատիկ ավելի շատ խնչած ունեմ, թե ինչ-որ անուս և թեթևամիտ մարդիկ կարող են դժգոհ մնալ էն որոշումից, որը կարող է փրկել տասնյակ մարդկանց կյանքեր...»,-գրել էր խոսնակը, նկատի ունենալով Երևանում ճանապարհների վրա առավելագույն արագությունը 60 կմ/ժ-ից 50 կմ/ժ-իջեցնելու որոշումը: Գրառումը շուտով ջնջվեց, իսկ Հակոբյանը ստիպված էր ներողություն խնդրել իր նման պահվածքի համար:

Այսօր էլ արդեն գրառում է կատարել Քաղաքապետարանի տեղեկատվության և հասարակայնության հետ կապերի վարչության պետ Հովսեփ Կուբատյանը, ով ֆեյսբուքյան իր էջում գրել էր՝ «Քանի բոլոր նրանք, ովքեր մեր երկրի էներգետիկ անվտանգությունը զրոյացրել են, աջ ու ձախ խոսում են գազի գնի մասին հիշեցնեմ, որ գազի գինը չի թանկանում, եթե նույնիսկ թանկանում է, ապա գազը, իսկ գազի գինը կարող է բարձրանալ, բայց ոչ թանկանալ»: Այն բանից հետո, երբ սոցցանցի օգտատերերը Կուբատյանին կնքեցին «երկրորդ Գալուստ Սահակյան», վերջինս հեռացրեց իր գրառումը, ճիշտ է փոխարենը անելով նորը ՝ ոչ պակաս անհեթեթը:

Սակայն հայրենի պաշտոնյաներից և ոչ մեկը չի կարող գրել-ջնջելու հարցում մրցել վարչապետ Նիկոլ Փաշինյանի և վերջինիս ռեկորդների հետ: Նիկոլ Փաշինյանը վերջերս գրառում էր արել՝ ներկայացնելով Հայաստան ժամանողների վերաբերյալ վիճակագրություն։ Փաշինյանն այնուհետև ջնջել էր գրառումը՝ տեղեկացնելով դրա մասին։ Այնուհետև նոր գրառում էր արել՝ ներկայացնելով նոր տվյալներ։ Վարչապետը կրկին ջնջել էր գրառումը: Թվով ավելի շատ գրառումներ էլ խմբագրվել են՝ առանց այդ մասին տեղեկացնելու: Այսպիսով, կարող ենք փաստել, որ Նիկոլ Փաշինյանի ֆեյսբուքյան էջի գրառումները հաճախ խմբագրվում են, փոփոխությունների ենթարկվում կամ ընդհանրապես ջնջվում՝ դրանց մասին որոշ դեպքերում պատշաճ չտեղեկացնելով արդեն իսկ տեղեկատվությունը ստացած քաղաքացիներին։

2018 թ. հեղափոխության օրերին և դրանից հետո սոցիալական ցանցերի դերն աննախադեպ աճեց։ Հետհեղափոխական իշխանության ներկայացուցիչները սկսեցին օգտագործել, մասնավորապես, Ֆեյսբուքը՝ իրենց կատարած աշխատանքը, ծրագրերը և վիճակագրությունը ներկայացնելու համար։ Նրանց գրառումներն արտատպվում են բազմաթիվ լրատվամիջոցներում՝ որպես պաշտոնական տեղեկատվություն, սակայն, ինչպես երևում է, անգամ այդ հանգամանքը չի սթափեցնում վերջիններիս և չի ստիպում մոտենալ սեփական խոսքին ու գործին փոքր ինչ ավելի մեծ պատասխանատվությամբ, ինչի արդյունքում էլ հայրենի պաշտոնյաների մոտ ձևավորվել է սեփական գրառումները «գրել-ջնջելու» ավանդույթը…