Սեփական խոստումները շատ արագ մոռացած պաշտոնյաները

Վերլուծական 22 Հունվար, 2020 16:30

Այն, որ նոր իշխանությունները մեծ սեր ունեն խոստումներ տալու և այնուհետև դրանք մոռացության մատնելու հետ՝ գաղտնիք չէ: Անցած, շուրջ, երկու տարիների ընթացքում ՀՀ հպարտ քաղաքացիները ունեցել են հնարավորություն՝ համոզվելու այդ հանգամանքի մեջ: Ստորև ներկայացնենք ՔՊ այն պաշտոնյաների թոփ քառյակը, ովքեր պաշտոնը ստանձնելուց հետո մոռացել են սեփական խոստումների մասին:

Այդ ցանկը, անշուշտ, գլխավորում է ՀՀ վարչապետ Նիկոլ Փաշինյանը՝ կարմիր գծերի վերացումից մինչև գազի գնի էժանացում, Արցախի բանակցությունների սուբյեկտ դառնալուց մինչև մենաշնորհների վերացում, ԲՈՒՀ-երի ապաքաղաքականացումից մինչև պետական աշխատողների աշխատավարձերի կտրուկ բարձրացում, «վենդետա չի լինելու»-ից մինչև բիզնեսի և քաղաքականության տարանջատում:

Երկրորդ տեղում Երևանի քաղաքապետ Հայկ Մարությանն է: Նա խոստանում էր մաքրել Երևանը, լուծել տրանսպորտի խնդիրը, վերացնել երևանցիներին հոգեհան անող կարմիր գծերը, անհաշտ պայքար մղել ապօրինի շինարարության դեմ, բարելավել, մասնավորապես, պոլիկլինիկաների շենքային պայմանները, վերանորոգել վերելակները, կառուցել մետրոյի նոր կայարան, ունենալ կանաչապատ Երևան և այլն: Ընդ որում՝ սեփական խոստումներն է՛լ ավելի ազդու դարձնելու համար Երևանը Կովկասի մարգարիտ դարձնել խոստացող հեղափոխական Մարությանը հավաստիացնում էր, որ այդ ամենը պատրաստվում է կյանքի կոչել, բացառապես, քաղաքի բյուջեն խնայելով, ամեն մի լումայի վրա դողալով: Կարճ ասած՝ խոստանում էր դառնալ քաղաքի պատմության ամենաականավոր քաղաքապետն ու անել դա նվազագույն ծախսերով:

Երրորդ տեղում Էջմիածնի քաղաքապետ Դիանա Գասպարյանն է: Վերջինս խոստանում էր քաղաքը մաքրել հանցավոր կլաններից, բարելավել էջմիածինցիների սոցիալական վիճակը, իսկ մի քանի ամիս անց հայտարարում էր, որ բնակիչները սովոր են բոլոր թերացումներն ու բացերը բարդել քաղաքապետարանի վրա, թերևս՝ բնակիչները ամեն դեպքում թերացումներ գտել են և բնական է, որ պետք է բարդեն դա քաղաքի ղեկավար մարմնի կողմից՝ իր աշխատանքները թերի կատարելու վրա:

Չորրորդ տեղում Արմավիրի քաղաքապետ Դավիթ Խուդաթյանն է: Վերջինս ընտրվելուց առաջ խոստանում էր եղած ռեսուրսները ճիշտ բաշխել ե՛ւ ճանապարհաշինության, ե՛ւ լուսավորության ցանցի ընդլայնման, ե՛ւ ոռոգման համակարգի լավացման, ե՛ւ քաղաքում մշակութային կյանքի ակտիվացման համար, ընդ որում՝ ոչ միայն համայնքային բյուջեով, այլեւ ծրագրերով, սուբվենցիոն ծրագրերով՝ ներդրողներ եւ ներդրումներ բերելով քաղաք: Ինչպես երևում է Արմավիրի քաղաքապետարանի պաշտոնական կայքից՝ քաղաքապետը դեռ չի հասել իր տված խոստումների իրականացմանը, սակայն, որպես սփոփանք կարելի է նշել, որ մշակութային միջոցառումների պակաս քաղաքում չի զգացվում:

Ցանկը, իհարկե, երկար կարելի է շարունակել, քանի որ իշխող քաղաքական ուժի բազմաթիվ ներկայացուցիչներ են աչքի ընկել՝ սեփական նախընտրական խոստումները մոռանալու հատկությամբ, այդ թվում նաև պատգամավորներ, ովքեր ընտրողին խոստանում էին ԱԺ-ում բարձրացնել վերջիններիս խնդիրները, սակայն, ըստ պաշտոնական վիճակագրության, մինչ օրս աչքի են ընկել միայն 0 ելույթներով և միլիոնների հասնող պարգևատրումներով…