Որոնք են ձվի գնանկման պատճառները (տեսանյութ)

«Սա ձուն ավելի բարձր գնով վաճառելու սեզոն է, այնինչ տեղի է ունենում տարօրինակ երևույթ շուկայում, անսպասելի գնանկում ունենք»,- ասաց Հայաստանի Հանրապետության տնտեսական մրցակցության պաշտպանության պետական հանձնաժողովի նախագահ Գեղամ Գևորգյանն՝ այսօր Աժ-ում հանձնաժողովների հետ թեմայի քննարկման ժամանակ:

«Այն տեղեկատվությունը, որ մամուլում շրջանառվում է՝ կապված մեծ քանակով ձու ներմուծելու մասին, որի հետ էլ կապում են ձվի այսքան էժանացումը, չի համապատասխանում իրականությանը: ՀՀ-ում ձվի ներմուծում չի արձանագրվել, մենք ՊԵԿ-ից տեղեկատվություն ենք խնդրել, ներմուծման դեպք չկա»: Գևորգյանի պնդմամբ՝ հաջորդ խնդիրը, որ պետք է կարողանան հասկանալ` տնտեսական մրցակցության խախտման հատկանիշներ հայտնաբերելն է:

«Եթե իրավիճակը ձվի գերարտադրության պատճառով է, ապա պետք է հասկանաք` այս գնանկումն արդյոք ունի տնտեսական մրցակցության խախտման հատկանիշներ, մասնավորապես` գերիշխող տնտեսվարողների կողմից փոքրերին դուրս մղելու քաղաքականություն է, թե օբյեկտիվ տնտեսական պատճառներով է պայմանավորված ձվի գնանկումը: Հիմա մենք իրականացնում ենք ձվի ինքնարժեքի հաշվարկ: Հարցում ենք կատարել նաև ձու ածող հավերի ներմուծման թվաքանակի ավելացման հետ կապված»: Իրավիճակում հաջորդ մտահոգությունը կապված է էժան գնով վաճառվող ձվերի ժամկետներին և ձվի որակի հետ: «Եթե կա գերաճ ձվի արտադրության ոլորտում, ապա պետք է հասկանանք դրանց պահպանման, արտադրման ժամկետները: Անվտանգության տեսանկյունից հայտնաբերվել են որոշ անհանգստացնող երևույթներ: Ստուգում ենք նաև ձվի քաշերը, կա ձվի ստանդարտ քաշ, պետք է հասկանանք արդյոք խախտումներ չկան այս մասով, այսինքն, օրինակ, առաջին կարգի ներկայացվող- վաճառվող ձուն իրոք առաջին կարգի է, թե՝ ոչ»:

Հայաստանի Հանրապետության տնտեսական մրցակցության պաշտպանության պետական հանձնաժողովի նախնական ուսումնասիրություններով՝ գնանկման պատճառը ձվի գերարտադրությունն է, սակայն Գևորգյանը չի բացառում` հետագա ուսումնասիրությունները դեռ նոր հանգամանքներ ի հայտ կբերեն: