Բնակարան և գումար. հայտարարագրված նվերների հետքերով
Վերլուծական
Հայաստանի զանգվածային լրատվության միջոցները հեղեղված են մեր տարբեր մակարդակի պաշտոնյաների ու նրանց հարազատների ստացած ահռելի եկամուտների մասին հրապարակումներով։ Ընդ որում, այդ հրապարակումների համար հիմք են հանդիսանում խիստ պաշտոնական փաստաթղթեր։ Խոսքը պաշտոնյաների ներկայացրած գույքի եւ եկամուտների հայտարարագրերի մասին է, որոնք տեղադրված են Բարձրաստիճան պաշտոնատար անձանց էթիկայի հանձնաժողովի պաշտոնական կայքում։ Հայտարարագրերում առավել ուշագրավ կետերից մեկը վերաբերվում է նվերներին. պարզվում է՝ նոր Հայաստանի պաշտոնյաները նախկիններից պակաս հոժարակամ չեն նվերներ ստանալու հարցում և նույնքան ջանասիրաբար էլ թաքցնում են այդ նվերների նախապատմությունները:
Դիցուք, Երեւանի ընդհանուր իրավասության դատարանի 37-ամյա դատավոր Տաթևիկ Ստեփանյանի դրամական միջոցները կազմում են 14 մլն դրամ, 24 հազար դոլար: Որպես եկամուտ՝ նա հայտարարագրել է իր աշխատավարձը, որը ամսական կազմել է 524 հազար դրամ եւ ստացած 6 մլն 386 հազար դրամի չափով վարկը: Իսկ ահա երիտասարդ դատավորի ամուսնու` Արման Հովսեփյանի դրամական միջոցները կազմել են 29 մլն դրամ եւ 78 հազար դոլար: Ի տարբերություն Տաթեւիկ Ստեփանյանի՝ նրա ամուսնու համար անցած տարին բավականին եկամտաբեր է եղել: Օրինակ, նախորդ տարում նրան 64 հազար 700 դոլարի չափով «նվիրատվություն» է տրվել: Ում կողմից՝ հայտնի չէ:
Արամ Մկրտչյանը Լոռու մարզի առաջին ատյանի ընդհանուր իրավասության դատարանի դատավոր նշանակվելուց 4 ամիս անց 30 միլիոն դրամ արժողությամբ բնակարան է նվիրատվություն ստացել։ Այդ մասին պարզ է դառնում դատավորի 2018 թվականի տարեկան հայտարարագրի ուսումնասիրությունից։ Տունը դատավորի ստացած միակ «նվերը» չէ․ պաշտոնը ստանձնելիս նա հայտարարագրել է նաև 8 միլիոն դրամը գերազանցող թանկարժեք գույք՝ ժամացույց։ Մկրտչյանը պարզաբանել է, որ ժամացույցը հորից է նվեր ստացել:
Արամ Հովհաննիսյանը Արմավիրի մարզպետարանի գլխավոր քարտուղարի տեղակալի պաշտոնը զբաղեցնում է 2017 թ.-ից եւ պաշտոնը ստանձնելու հայտարարագրում նշել է, որ ունի 10 մլն դրամ գումար, մեկ անհատական բնակելի տուն եւ «Mercedes Benz E 500» մակնիշի մեքենա։ Նույն տարվա տարեկան հայտարարագրից երեւում է, որ Հովհաննիսյանը որպես ժառանգություն ստացել է բնակելի տուն, հողամաս եւ «VAZ21061» մակնիշի ավտոմեքենա: Ժառանգության ընդհանուր արժեքը մոտ 6 մլն դրամ է։ Հաջորդ տարվա՝ 2018-ի տարեկան հայտարարագրում Հովհաննիսյանը նշել է, որ ստացել է բնակելի տուն։ Որպես նվիրատվություն ստացած այդ տան արժեքը 25 մլն դրամ է։
Սամվել Առաքելյանը Սահմանադրական դատարանի աշխատակազմի իրավախորհրդատվական ծառայության վարչության պետն է 2017թ.-ից։ Բարձրաստիճան անձանց էթիկայի հանձնաժողով դատական համակարգի ներկայացուցիչը ներկայացրել է ունեցվածքի երկու տարվա հայտարարգիր՝ 2017 և 2018թթ.-ի համար: Երկու տարիների ընթացքում Առաքելյանը երկու անգամ նվիրատվություն է ստացել։ Մասնավորապես՝ 2017թ-ին նա ստացել է 1,3 մլն ՀՀ դրամ, իսկ 2018-ին՝ 1 մլն դրամ նվիրատվություն։
Էդուարդ Աղաջանյանը վարչապետի աշխատակազմի ղեկավար է նշանակվել նախորդ տարվա մայիսի 10-ին: Մինչ այդ, նա աշխատել է HSBC բանկի Ռիսկերի կառավարման բաժնում` որպես ժամկետանց պարտավորությունների հավաքագրման բաժնի գործակալ: 2014-2017թթ. զբաղվել է անհատ ձեռնարկատիրությամբ: Ըստ այդ հայտարարագրի՝ վարչապետի աշխատակազմի ղեկավարը, որպես եկամուտ, ստացել է 1 մլն 504 հազար դրամ, որից 800 հազար դրամը եղել է նվիրատվություն, իսկ մնացածը՝ աշխատավարձ և այլ եկամուտ: Ինչ վերաբերում է 800 000 դրամ նվիրատվությանը, այն ստացել է ծնողներից՝ 4 ամսվա ընթացքում՝ ամսական 200 000 դրամի չափով:
ՀՀ հաշվեքննիչ պալատի նախագահ Լևոն Յոլյանը 2018-ին որպես նվիրատվություն է ստացել 7,500,000.00 ՀՀ դրամ:
Ամենադիտված 
Մնաս բարյավ. Րաֆֆի Հովհաննիսյան
