Օլիգարխների դեմ կազմված ակտերը «ջրվում» են. ո՞րն է պատճառը

Վերլուծական 11 Ապրիլ, 2020 20:00

Օլիգարխների դեմ կազմված ակտերը «ջրվում» են. ո՞րն է պատճառը

ՊԵԿ-ը հեղափոխությունից հետո, հատկապես վերջին շրջանում բավական ուշագրավ գործելակերպ է որդեգրել։ Փորձելով ցույց տալ, որ իրենք հետեւում են վարչապետի կոչին՝ անողոք պայքարում են ստվերի դեմ՝ շատ հաճախ տնտեսվարողների խոշոր ընկերություններում ստուգումներ են իրականացնում, ակտեր են կազմում, սակայն ավելի ուշ, երբ հայտնաբերված խախտումների շուրջ աղմուկը մարում է, այդ ակտերը չեղարկվում են կամ մեղմվում։ Դիցուք՝ դատական ակտերի հարկադիր կատարման ծառայության նախկին պետ, ներկայումս փախուստի մեջ գտնվող արդարադատության գեներալ Միհրան Պողոսյանի հետ փոխկապակցված ընկերությունները անցյալ տարեվերջին մեկը մյուսի հետևից դատարաններում հաղթել են Պետեկամուտների կոմիտեին։ ՊԵԿ-ը, մասնավորապես, 2018-ի ընթացքում մի քանի ակտ է կազմել Պողոսյանի հետ փոխկապակցված ընկերությունների դեմ։ Պողոսյանի ընկերության ներկայացուցիչները «անիրավաչափություն» են որակել այն, որ ՊԵԿ-ը հարկային հաշվարկի ժամանակ ապրանքի միջին գին որոշելիս հիմնվել է ազգային վիճակագրական ծառայության և 7 տնտեսվարող սուբյեկտների տրամադրած տվյալների վրա, «քանի որ այն հիմնված չէ որևէ նորմատիվ պահանջի վրա»։ Դեկտեմբերի 19-ին վարչական դատարանի դատավոր Ալեքսանդրա Հարությունյանը անվավեր է ճանաչել Պողոսյանի ընկերության նկատմամբ կազմված վերստուգման ակտը։ Պողոսյանի հետ փոխկապակցված մեկ այլ ընկերություն՝ «Ֆրուտ վորլդ»-ը 2018-ի հոկտեմբերի 31-ին դարձյալ վարչական դատարանում վիճարկել է ՊԵԿ վերստուգման ակտը։ Մինչ այս երկու վճիռները Պողոսյանի մեկ այլ ընկերության՝ «Քեթրին գրուպ»-ի ներկայացուցիչներին դեռ հոկտեմբերին հաջողվել էր հասնել ՊԵԿ-ի մեկ այլ ակտի անվավեր ճանաչման, որը դարձյալ վերաբերում էր կեղծ հարկային տվյալներ ներկայացնելուն։ Այս դեպքից բացի ևս մեկ դեպք էր արձանագրվել. մամուլում գրվել էր այն մասին, որ Սերժ Սարգսյանի թիկնազորի պետ Վաչագան Ղազարյանին՝ Սերժի Վաչոյին պատկանող «Սեզամգազց»-ում ստուգումների արդյունքում ակտ է կազմվել, սակայն այդ ակտը արդեն ՊԵԿ գանգատարկման հանձնաժողովում «ջրվել» է։ ՊԵԿ-ից այդ հրապարակումներին արձագանքեցին՝ ակտերը չեն ջրվել, ստուգումներն էլ շարունակվում են: 2018-ին ՊԵԿ գանգատարկման հանձնաժողովը մասամբ բավարարել է «Ռաֆիկ Հայրապետյան» ՍՊԸ-ի դիմում բողոքը: 2019-ին ՊԵԿ-ում համապատասխան ակտ էին կազմել նաև «Գազ Սուզան Արմենիա» ընկերության դեմ, սակայն վերջիններիս բողոքը, հասնելով ՊԵԿ գանգատարկման հանձնաժողով, մասնակիորեն ջրվել էր: Նույն հանձնաժողովը 2019-ին ամբողջությամբ բավարարել է «Մոնբլան 4810» ՍՊԸ-ի դիմում-բողոքը և փաստացի ջրել կազմված ակտը: 2019-ին ամբողջությամբ բավարարվել է նաև «Իմեքս Գրուպ»-ի դիմում–բողոքը՝ կազմված ակտն էլ ճանաչվել է անվավեր: