Փաստաթղթերը չեն գաղտնազերծվում. ո՞ւմ են «պահում» իշխանությունները

Վարչապետ ընտրվելուց հետո Նիկոլ Փաշինյանն իր թիմին կոչ էր արել հանրայնացնել նախկինների ապօրինությունները փաստող բոլոր փաստաթղթերը, որոնք ի պաշտոնե կհայտնվեն իրենց ձեռքի տակ: Անցել է երկու տարի, սակայն մեր գերատեսչությունները չեն շտապում իրենց նախորդների կեղտոտ սպիտակեղենը փռել հանրության աչքի առաջ, չնայած, որ դա է պահանջում Տեղեկատվության ազատության մասին օրենքը, իհարկե, դա չի նշանակում, որ բոլոր գաղտնազերծված փաստաթղթերում պետք է նախկինների կիքսերը հայտնաբերվեն, սակայն, այն, որ դրանք պետք է դառնան հանրության սեփականությունը, փաստ է: Մեկ ձեռքի մատների վրա կարելի է հաշվել, թե այս ընթացքում քանի փաստաթուղթ են գաղտնազերծել մեր պետական մարմինները:

2018-ին գաղտնազերծված փաստաթղթերի մասին տեղեկացրել է միայն 5 պետական մարմին: Այս պետական կառույցների պատասխանները, սակայն, հաստատում են, որ գաղտնազերծումը դեռևս չի նշանակում, որ տվյալ փաստաթուղթն արդեն հրապարակային է և բաց հանրության համար։ Միայն ՀՀ էներգետիկ ենթակառուցվածքների և բնական պաշարների նախարարությունն է, որ 2018թ.-ի ընթացքում գաղտնազերծել է 2 էջանոց մեկ փաստաթուղթ՝ Նախարարության և նրա համակարգում գաղտնագրման ենթակա տեղեկությունների ընդլայնված գերատեսչական ցանկը (http://www.givemeinfo.am/hy/case/2621/)։ 2009-2017 թվականներին՝ յուրաքանչյուր տարի գաղտնազերվել է մեկ փաստաթուղթ, որոնք հանրային նշանակության փաստաթղթեր չեն եղել։ 2019-ն էլ բացառություն չէր: Ստացվում է՝ մեր մարզպետները և նախարարները մշտապես մատ են թափ տալիս՝ հայտարարելով, որ վաղը, մյուս օրը իրենց ձեռքի տակ եղած տեղեկատվությունը նախկինների գործունեության մասին կներկայացնեն հանրության դատին, սակայն գաղտնապահությունը շարունակվում է: Որևէ գերատեսչություն որևէ փաստաթուղթ նախորդ տարի չի գաղտնազերծել և սա մտածելու տեղիք է տալիս:

Կա՛մ նախկինները նախորդ տաս տարիների ընթացքում որևէ կիքս չեն տվել, հետևաբար նրանց գործողությունները գաղտնազերծելու որևէ հիմք էլ չկա, կա՛մ առկա է որոշակի պայմանավորվածություն այդ նույն նախկինների հետ, կամ էլ չի բացառվում, որ տեղեկատվությունը հատուկ է թաքցվում հանրությունից, հետագայում այս կամ այն պաշտոնյայի դեմ սեփական քաղաքական նպատակներով այն օգտագործելու համար: Որն էլ որ լինի փաստաթղթերը չգաղտնազերծելու պատճառը, այդ պատճառը անընդունելի է և հակասում է օրենսդրության պահանջներին: Փաստորեն, նույնիսկ իշխանափոխությունն ու հեղափոխությունը չխթանեցին նախկինում գաղտնի համարված և տասնյակ տարիներ գաղտնիության կարգավիճակ ունեցող փաստաթղթերը գաղտնազերծելու և հրապարակայնացնելու պրակտիկան։