Տավուշում երեխաները ուժեղ ձայներից, կրակոցներից վախենում են. առաջարկ կա նրանց բերել Երևան

Համացանցում լայնորեն քննարկվում է Տավուշի մարզի սահմանամերձ համայնքների երեխաներին Երևան կամ այլ ապահով վայր տեղափոխելու հարցը: Առաջարկ կա երեխաներին պահել որևէ ճամբարում. նրանց հետ կաշխատեն հոգեբանները, քանի որ սահմանում տիրող պատերազմական գործողությունների հետևանքով երեխաները վախեր են ձեռք բերում, հոգեբանական խնդիրներ են առաջանում:

Առաջարկն արել է հոգեբան Անի Խուդոյանը: ԼՈՒՐԵՐ.com-ի հետ զրույցում հոգեբանն ասաց, որ սպասում են պետական մարմինների արձագանքներին. «Դա գաղափար է, մինչև պատկան մարմինները չարձագանքեն, ոչ մի բան հնարավոր չի լինի անել: Մենք ընդամենը հայտարարություն ենք տարածել, որ միավորվենք բոլոր հոգեբաններով, սահմանամերձ երեխեքի հետ աշխատենք, նաև նրանց հետաքրքիր ժամանցն ապահովենք:  Ամբողջ խնդիրն այն է, որ 5-10 երեխա չեն, բնականաբար, շատ են  ու մեզ աջակցություն է պետք»:

Հոգեբանին անհանգստացնում է միայն տարածքի խնդիրը. «Սննդի ու կամավորների հարցը, կարծում եմ, լուծված է, քանի  որ գրառմանս մեկնաբանություններում շատ պատրաստակամ մարդիկ են արձագանքել: Ես կարող եմ երեխաներին բերել մեր կենտրոն, բայց ընդամենը 6-7 երեխա կտեղավորվի, չեն էլ կարող քնել այստեղ, որովհետև հարմարություն չկա: Մինչև անգամ դրսից զանգում, ասում են՝ մենք կֆինանսավորենք ինչով, որ պետք է: Եթե այս ամենը կազմակերպվի պետական մակարդակով, բոլոր խնդիրները կլուծվեն»,- ընդգծեց հոգեբանը:

Խուդոյանի խոսքով՝ ծնողները պատմում են, որ երեխաները ուժեղ ձայներից, կրակոցներից վախենում են, սկսել են վախից չխոսել, լեզուններն են կապտում...

«Ծնողները, որ նկարագրեցին, ես առաջարկեցի մի քանի երեխայի իմ տանը պահել, ասացին՝ տեսնենք, եթե իրավիճակը չհանդարտվի՝ այդպես կանենք: Բայց, անկախ դրանից, երեխաներին պետք է հոգեբանական աջակցություն, որովհետև իրենք արդեն անցել են այդ ամենի միջով, իսկ հետքը՝ մնացել է»,- պատմեց Անին և հավելեց. «Հայտարարությանս մեկնաբանություններում ծնողներ էլ են արձագանքել, գրում են, որ իրենք էլ են մարզից, ու իրենց երեխեքի մոտ էլ վախեր են առաջացել»:

«ԼՀԿ» պատգամավոր Անի Սամսոնյանը ԼՈՒՐԵՐ.com-ի հետ զրույցում նշեց, որ Անի Խուդոյանի հայտարարության հետ կապված դեռևս քննարկումներ չեն եղել. «Ցանկացած  գաղափար պետք է ունենա  նպատակահարմարություն, եթե քննարկենք, հասկանանք, որ կա նշվածը, միգուցե իրագործենք»:

«ԲՀԿ» պատգամավոր Նաիրա Զոհրաբյանը մեզ հետ զրույցում նշեց, որ այդ մասին խոսել է սահմանամերձ համայնքների ղեկավարների հետ. «Երեկվա դրությամբ ասել են, որ նման անհրաժեշտություն չկա, արդեն խաղաղ է: Ես այսօր պատրաստվում եմ նորից խոսել, եթե գտնեն, որ անհրաժեշտությունը կա, բնականաբար, մենք բոլորս էլ պատրաստ ենք մեր  տանը ընդունել Տավուշի մարզի երեխաներին»,- ասաց պատգամավորը:

Նշենք, որ Զոհրաբյանը առաջարկում է երեխաներին տեղափոխել հանգստյան գոտիներ. «Բազմաթիվ հանգստյան գոտիներ ունենք, որ հիմա  մատնված են պարապուրդի, և ճիշտ կլինի՝ սահմանամերձ գյուղերի երեխաներին տեղափոխել այդտեղ, անկախ նրանից՝ սահմանային լարվածություն կա՞, թե՞ ոչ»,- եզրափակեց պատգամավորը:

Հիշեցնենք, որ հոգաբան Անի Խուդոյանը հայտարարություն է տարածել ֆեյսբուքում, որում, մասնավորապես, նշել է. «Տավուշի երեխեքի համար անվճար ճամբարներ ա պետք կազմակերպել Երևանում 10-15 օրով, համ երեխեքը հեռու կմնան էդ ամենից, հա՛մ էլ էստեղ լիքը հոգեբաններով կմիավորվենք երեխեքի հետ կաշխատենք, շատ ծնողներից նամակներ եմ ստանում, երեխեքի մոտ լուրջ վախեր են առաջացել ՝ սոմատիկ տարբեր դրսևորումներով։ Շատ չէ, գոնե 10 օր։ Մեր պաշտոնյաների համար հաստատ մեծ խնդիր չի նման բան կազմակերպելը!!! էնքան կամավորներ կլինեն, որ կմիանան երեխեքին խնամելու հարցում»:

Արփինե Հակոբյան