Արարատի մարզում 66-ամյա տղամարդը փորձել է տան բակի չոր խոտն այրել, ինչն էլ դարձել է նրա մահվան պատճառ

Այսօր՝ հուլիսի 27-ին, ողբերգական դեպք է տեղի ունեցել Արարատի մարզում։ Ժամը 15։35-ի սահմաններում Արտակարգ իրավիճակների նախարարության փրկարար ծառայության 9-11 օպերատիվ կառավարման կենտրոն ահազանգ է ստացվել, որ Ոստան գյուղի Երևանյան փողոցի տներից մեկի բակում հրդեհ է բռնկվել։

Ինչպես հայտնում է Shamshyan.com-ը, դեպքի վայր են ժամանել ԱԻն ՓԾ Արարատի մարզային փրկարարական վարչության հրշեջ-փրկարարական ջոկատը՝ 2 մարտական հաշվարկով։

Փրկարարները մարել են թիվ 47 տան և դրա հարևանությամբ բռնկված ու տարածված կրակը, որտեղ էլ հայտնաբերել են տղամարդու դի։

Օպերատիվորեն ժամանել են ոստիկանության Արարատի մարզային վարչության պետ Կամո Ցուցուլյանը և ոստիկանության Արտաշատի բաժնի պետ Դավիթ Պետրոսյանը։

Ոստիկանները պարզել են, որ մահացածը նշված տան բնակիչ՝ 66-ամյա Մ. Պ-ն էր։

Կայքի տեղեկություններով՝ Մ. Պ-ն իր տան չոր խոտը վառելիս է եղել, և այն տարածվել է հարևանի տարածք, ու փորձել է մարել նաև այդ կրակը, սակայն ծխախեղդ է եղել, իսկ մարմնի որոշ հատվածներ էլ այրվել են։

Փաստի առթիվ Գ. Մանասերյանի որոշմամբ նշանակվել են մի շարք փորձաքննություններ, այդ թվում՝ դիակի դատաբժշկական։