«Ամուլսար ասելիս ոստիկանները լխկում են» ․ ցուցարարները իրենց հետ բաց նամակ են բերել՝ ուղղված վարչապետին

Ի նշան Ամուլսարի հանքի շահագործման դեմ բողոքի՝ Ամուլսարի պահապանները սպասում են իրենց համախոհներին, որոնք  Ջերմուկից գալիս են Երևան, իրենց ձայնը լսելի դարձնելու համար: Բողոքի ակցիա իրականացնողները իրենց հետ են բերել պաստառներ, որոնցում կարելի է տեսնել հետևյալ գրությունները. «Մենք ենք մեր սարերը ու կողքի մանր-մունր քարերը», «Ամուլսար ասելիս ծնկներս դողում են. ՀՀ կառավարություն», «Ամուլսար ասելիս ոստիկանները լխկում են, չգիտեմ՝ ինչու՞ է այդպես», «Ուժը կորցրած համարել Ամուլսարի ՇՄԱԳ-ը»: Բացի պաստառներից ցուցարարները իրենց հետ բերել են նաև բաց նամակ՝ ուղղված վարչապետին, որում պահանջվում է Ամուլսարի ՇՄԱԳ-ի ուժը կորցրած համարել: 

«Հայկական բնապահպանական ճակատ» նախաձեռնության անդամներից մեկը լրագրողների հետ զրույցում ասաց. «Մենք եկել ենք էստեղ՝ աջակցելու տեղացիներին, որոնք ավտոերթով գալիս են իրենց պահանջը ևս մեկ անգամ ներկայացնելու: Հիշեցնեմ, որ 2.5 տարի տեղացիները փակել են դեպի հանք տանող ճանապարհները ու հիմա պահանջում ենք, որ կասեցվի էս կոռուպցիոն, ապօրինի ձևով ստացված նախագիծը. մինչև հիմա կառավարությունը ոչ մի քայլ չի արել: Մենք նոր էլ ընթերցեցինք, որ բոլոր հիմքերը կան ՇՄԱԳ-ի ուժը կորցրած համարելու համար»,- ասաց նա:

«Մենք մասնագիտական վերլուծություն չենք անում, ժողովուրդ ջան, որովհետև բոլոր մասնագիտական վերլուծությունները վաղուց արվել են սկսված 2012 թվականից: Ամեն ինչ գրված է ու ասված. ցանկացած մարդ, որը ողջամիտ մտածողություն ունի, կարա կարդա, կամ կոնֆերանսը նայի ու հասկանա, որ ասվում է՝ չեն կարող հավաստիացնել, որ հանքի շահագործումը անվտանգ կլինի, դա հայտնի չէ. էլ ի՞նչ է պետք մեր կառավարությանը, որը կապացուցի, որ էդ թղթերը չեն ապացուցում, որ հանք շահագործելը անվտանգ է: Իսկ կառավարությունը խոսք էր տվել, որ եթե ապացուցվի, որ ծրագիրն ունի վտանգներ, ապա չի իրականացվի հանքի շահագործում»,- նշեց մեկ այլ ցուցարար: