Թող գրանատ բերեն, գցեն էս ամբողջ Գեղարքունիք մարզը վերացնենք, քաշվենք մի կողմ․ ձկնորս

Սեւան-Երեւան մայրուղին երկկողմանի փակած ձկնորսները Գեղարքունիքի մարզպետ Գնել Սանոսյանի հետ ունեցած երկխոսությունից հետո բացեցին այն։ 

«Սիգը շատ-շատ է, էդ ով որ քնից զարթնում, ասում է՝ Սևանի ավազանում մնացել է 1․5 տոննա սիգ, ուղղակի իր մտքով էդ թիվն է անցել։ Առավոտից երեկո մենք էդ ջրում ենք, գիտենք, որ շատ ձուկ կա։ Սևանում 500 գրամանոց ձուկ 100 հատից 5-ն է։ Հիմա բռնենք 5 հատ ձուկ, 1 ձկան արժեքը 20 000 դրամ դնենք, ո՞վ կգնի»,- լրագրողների հետ զրույցում ասաց ձկնորսներից մեկը։

Դիտարկմանը, թե նաև մանր ձուկ է որսվում, մինչդեռ երբ այն մեծանա, ավելի շատ օգուտ կտա, ձկնորսը պատասխանեց․ «Մենք մանր ձուկ չենք բռնում, դա ինքըստինքյան ընկնում է ցանցի մեջ»։

«Դե որ տենց է, թող մեծն էլ չբռնենք, միլիարդավոր գումարի իկրա է թողնում։ Թող գրանատ բերեն գցեն էս ամբողջ Գեղարքունիք մարզը վերացնենք, քաշվենք մի կողմ»,- ասաց նա։

Ձկնորսները ասացին, որ  որոշում են կայացրել մայրուղին բացել, որովհետև առաջիկա երեքշաբթի օրը պետք է քննարկում լինի և իրենց հուզող հարցերի պատասխանը ստանան։

Նշենք, որ մայրուղին փակելու պատճառը ձկնորսությամբ զբաղվելու արգելքն էր։

Հիշեցնենք, որ օրեր առաջ Շրջակա միջավայրի նախարար Ռոմանոս Պետրոսյանը հայտնեց, որ  հունիսի 18-ի կառավարության  որոշմամբ թույլատրվել է Սևանա լճում սիգ ձկան փորձարարական որս անել,  բայց  միայն այն դեպքում, երբ ձուկը  500 գրամից ոչ պակաս է կշռում։ 1 կգ-ի համար բնօգտագործման վճար է սահմանվել 65 դրամը։