Դատախազությունը միգուցե 268 տուժողից ընտրել է նրանց, որոնք պատրաստ են ամբողջ մեղքը բարդել Քոչարյանի վրա. Ալումյան

Ռոբերտ Քոչարյանի և մյուսների գործով դատավարությունն, իրոք, ֆարս է, բայց ոչ բոլորովին այն պատճառաբանությամբ, ինչ հիմա հայտարարում են տուժողների իրավահաջորդները, այս մասին այսօր՝ սպտեմբերի 9-ին, ասուլիսի ժամանակ ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը։

«Ֆարս է այն պատճառով, որ դատարանը ընդհանրապես պատրաստ չէ այս գործով իրականացնել արդարադատության։ Դատարանն այս գործով մեղադրողներից մեկն է, որը պատմուճանով հայտնվել է դատավորի աթոռին», - ասաց նա։

«Մենք, ըստ էության, հակառակ կողմերում ենք, մի կողմից մենք ենք՝ ամբաստանյալներն ու նրանց պաշտպանները, մյուս կողմից՝ մեղադրողներն ու դատարանը, իրոք որ, սա կարելի է անվանել ֆարս, բայց ինչ վերաբերում է այն բանին, որ տուժողների իրավահաջորդները, Տիգրան Եգորյանը, Սեդա Սաֆարյանն են դժգոհում դատարանի գործողություններից, հնարավոր է, որ ուղղակի ուրիշ պատճառ ունեն դատավարությանը չգալու, բայց այդ ձևով փորձում են ավելի մեծ ճնշում գործադրել դատարանի վրա: Հավատացնեմ իրենց, որ դատարանի վրա ճնշում առկա է եղել մեղադրանքի կողմից արդեն իսկ, որովհետև այն որոշումները, որը դատարանը կայացնում է, դրանք այլ կերպ, քան ճնշման ազդեցության տակ, սովորաբար չեն կայացվում», - նշեց Քոչարյանի պաշտպանը։

Ալումյանը նշեց՝ ինչո՞ւ է դատախազութունը 268 տուժողից ընդամենը 102 հոգու առանձնացրել  և ներկայացրել որպես տուժող։ «Ո՞րն է այդ չափանիշը, որ 268 տուժողից դուք ընտրել եք հենց այդ 102-ին, միգուցե այն պատճառով, որ ընտրել եք նրանց, ովքեր պատրաստ են Մարտի 1-ի իրադարձություների ամբողջ մեղքը բարդել Ռոբերտ Քոչարյանի վրա, եթե դա չէ պատճառը, ապա բացատրեք, ի՞նչ չափանիշ եք ընտրել։ Միգուցե տուժողները տարբերվում են ստացած մարմնական վնասվածքներով և այդ պատճառո՞վ եք ընտրել այդ չափանիշը, բայց նայում ենք ու տեսնում, որ նույն վնասվածքներն են ստացել տուժողները»։ 

Դիտարկմանը, որ Արդարադատության նախարարը նշել է, թե Ռոբերտ Քոչարյանի գործով դատական նիստերն անիմաստ ձգձգվում են, ինչ կասի այս մասին, Ալումյանը պատասխանեց․ «Արդարադատության նախարարը գլխավորապես շեշտը դրեց այն բանի վրա, որ այս գործով  դատավորները ամեն կերպ փորձել են ինքնաբացարկ հայտնել և գործը մի դատավորից անցել է մյուսին։ Իհարկե նրա ասածի մեջ կա ճշմարտություն, դատավորները չեն ուզում այս գործի հետ  ընդհանուր որևէ բան ունենալ և դա ակնհայտ երևում է հենց ինքնաբացարկների քանակից» ։