Չափորոշիչները կարվել են մրցույթն անցածների համար․ Գագիկ Գինոսյանը՝ Հանրային հեռարձակողի խորհրդի անդամների մրցույթում շահերի բախման մասին

Այսօր վարչապետի որոշմամբ Վահագն Թևոսյանն ու Վահրամ Մարտիրոսյանը նշանակվել են Հանրային հեռարձակողի խորհրդի անդամներ։ Ինչպես ավելի վաղ գրել էինք՝ ուշագրավ զարգացումներ էին տեղի ունենում թափուր տեղի համար հայտարարված մրցույթում․ խոսք էր գնում շահերի բախման մասին, քանի որ մեզ հասած տեղեկություններով` Վահրամ Մարտիրոսյանը աշխատում է «Մեդիա Նախաձեռնությունների Կենտրոնում» որտեղ ևս երկար տարիներ աշխատում է ժամանակավոր մրցութային հանձնաժողովի անդամ Նունե Հախվերդյանը, իսկ հանձնաժողովի մեկ այլ անդամ՝ Սամվել Մարտիրոսյանը, համագործակցում է տվյալ կենտրոնի հետ։ Ստացվում է՝ նույն գրասենյակում աշխատող գործընկերներից մեկը հանձնաժողովի անդամ է, մյուսը` մրցույթի մասնակից։

ԼՈՒՐԵՐ․com-ի հետ զրույցում հասարակական գործիչ, ազգագրական պարերի մասնագետ Գագիկ Գինոսյանը նկատեց, որ մրցույթում ակնհայտ շահերի բախում կար մեկ այլ առումով ևս․ «Անցած թեկնածուներից մեկը պատգամավոր Վահագն Թևոսյանն է, որի նախաձեռնությամբ էլ որոշվել է հանձնաժողվի անդամների թիվը 5-ից դարձնել 7։ Սակայն, սրա վերաբերյալ որևէ հիմնավորում չկա։ Տպավորություն է, որ մարդն ինքն իր համար աշխատատեղ է ստեղծել․ երջանիկ պատահականություն է, երբ անդամների քանակը շատացնող մարդը հայտնվում է այդ տեղում։ Մասնակիցներիցս ոչ ոքին, գոնե իմ դեմքը, հանձնաժողովի որևէ անդամ չի տեսել, իսկ ինչո՞վ են վստահ, որ, օրինակ, իմ ներկայացրած ծրագրում գրած տեսլականների հեղինակը ես եմ, գուցե ավելի տաղանդավոր մեկի՞ն եմ գրել տվել։ Ո՞նց կարող է  հանձնաժողովն առանց թեկնածուների հետ անմիջական շփման որոշում կայացնել։ Որևէ մեկի դերն ու վաստակը չեմ նսեմացնում, բայց ո՞նց են վերցրել, որ մարդը, որը միայն լրագրությամբ է զբաղվել, պատգամավոր է եղել և իշխող կուսակցության մարդն է, իրենց շահերը հետապնդող, հենց ինքն է համապատասխան պաշտոնին»,- ասաց նա՝ նշելով, որ շահերի բախում կա, երբ տվյալ մարդն է օրենքը հաստատել և այդ օրենքով էլ ընտրվել։ 

Մրցույթում Գինոսյանը նաև կանոնադրական խախտում է նկատել․ ընտրող հանձնաժողովն ընտրվել է ավելի վաղ, քան վարչապետի հրամանն է եղել։ Հետևաբար, ասում է՝ բողոքարկելու ցանկություն կա, որի համար վարչպետի որոշմանն էր սպասում․ «Փաստաբանիս հետ պետք է խորհրդակցեմ, թե ինչ կարող եմ անել, քանի որ եթե Սերժ Սարգսյանի ստեղծած սահմանադրության պատճառով չենք կարողանում ազատագրվել ներկայիս կառավարությունից, այս դեպքում էլ Վահագն Թևոսյանի ստեղծած օրենքի շնորհիվ գուցե չկարողանա բողոքարկել և հաստատել իր դժգոհությունը»,- նշեց Գինոսյանը։ 

Նա նշեց՝ թեև հանձնաժողովին խնդրել էր հրապարակել չափորոշիչները, թե ինչի հիման վրա են ընտրել այս կամ այն անձին, սակայն այդպես էլ չեն հրապարակել․ «Ես չգիտեմ՝ ինչո՞վ չեմ համապատասխանել և ինչո՞վ են ընտրվածները համապատասխանում պաշտոնին։ Տպավորություն է, որ չափորոշիչները կարվել են այդ մարդկանց համար, որոնք պետք է անցնեին։ Ինձ ասում էին՝ անիմաստ ես մասնակցում մրցույթին, քանի որ կանխորոշված է՝ ովքեր են անցնելու։ Չեմ ուզում բամբասանքի վերածել, որ վերևից է հրահանգված եղել, բայց որ շահերի բախում կա՝ ակնհայտ է։ Կուզենայի, որ այդ հանձնաժողովը նայեր յուրաքանչյուր թեկնածուի աչքերի մեջ և ասեր, թե ինչու նա համապատասխան չէ այդ պաշտոնին։ Պատկերացնո՞ւմ եք քննություն, երբ մարդուն չեն տեսնում, բայց կտրում են, քանի որ նա իմքայլական չէ, կամ այս կամ այն շահերից չէ։ Կարելի է ենթադրել, որ իրենք գիտեին, թե ում պետք է ընտրեին»,- ասաց Գագիկ Գինոսյանը։ 

Նշենք, որ Հանրային Հեռարձակողի Խորհրդի անդամների թափուր տեղի համալրման մրցույթի համար հայտ էին ներկայացրել՝ Վահագն Թևոսյանը, Վազգեն Ավետյանը, Վահրամ Մարտիրոսյանը և Գագիկ Գինոսյանը:

Սոնա Հարությունյան