«Փաստ».Մարուքյանը Ֆիլիպ Ռիքերին է հանձնել Ադրբեջանի ռազմաքաղաքական իշխանության նկատմամբ սանկցիաների ցուցակը

«Փաստ» օրաթերթը գրում է. «Հունիսի 6-ից տարածաշրջանում գտնվող ԱՄՆ-ի՝ Եվրոպայի և Եվրասիայի հարցերով փոխպետքարտուղարի պաշտոնակատար Ֆիլիպ Ռիքերը երեկ ժամանել է Հայաստան և ունեցել մի շարք պաշտոնական հանդիպումներ: «Փաստ» թերթի տեղեկություններով, ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանը Ռիքերին փոխանցել է նամակ, որով կոչ է արել ԱՄՆ կառավարությանը՝ Ադրբեջանի ռազմաքաղաքական իշխանության մի շարք ներկայացուցիչների նկատմամբ կիրառել սանկցիաներ: Ներկայացվել են նաև համապատասխան հիմնավորումները, թե ինչու պետք է սանկցիաներ կիրառել:

Խոսքը Ադրբեջանի հետևյալ գործիչների մասին է. Ադրբեջանի Հանրապետության նախագահ Իլհամ Ալիև, փոխնախագահ Մեհրիբան Ալիևա, պաշտպանության նախարար Զաքիր Հասանով, ԶՈՒ գլխավոր շտաբի նախկին պետ Նաջմեդդին Սադիկով, ՆԳ նախարար Վիլայեթ Էյվազով, պետական սահմանապահ ծառայության պետ Էլչին Գուլիև, ԱԱԾ պետ Ալի Նագիև, արտաքին հետախուզական ծառայության պետ Օրհան Սուլթանով, վարչապետ Ալի Ասադով, Միլի մեջլիսի խոսնակ Սահիբա Գաֆարովա, ԱԳ նախարար Ջեյհուն Բայրամով, նախագահի աշխատակազմի արտաքին կապերի վարչության պետ Հիքմեթ Հաջիև:

«Փաստի» հետ զրույցում Էդմոն Մարուքյանը հաստատեց մեր տեղեկությունը և վստահություն հայտնեց, որ ԱՄՆ կողմից սանկցիաների կիրառման պարագայում Ադրբեջանն իր զորքերը կհանի Հայաստանից, իսկ մեր ռազմագերիները կվերադարձվեն հայրենիք»: