Մեզ պետք են գոլեր և այդ գոլերը խփելու ենք հունիսի 20-ին. Աշոտյան

Եթե ընդդիմադիր դաշտը շարունակի այսպես աշխատել, ապա հունիսի 20-ին արձանագրվելու է Նիկոլ Փաշինյանի վերահաս տոտալ պարտությունը եւ շատ կարեւոր է, որ ընդդիմադիր դաշտում որեւէ բեւեռ չտարվի անհատական խաղով: Այս մասին, այսօր՝ հունիսի 11-ին, մամուլի ասուլիսի ժամանակ նշեց ՀՀԿ փոխնախագահ Արմեն Աշոտյանը:

«Մենք ֆուտբոլից գիտենք, որ անհատական խաղը գեղեցիկ է, բայց միշտ չէ, որ ավարտվում է գոլով: Մեզ պետք են գոլեր եւ այդ գոլերը խփելու ենք հունիսի 20-ին»,-ասաց նա:

Աշոտյանը հայտարարեց, որ Նիկոլ Փաշինյանի քարոզչությունը հիշեցնում է վթարված կոյուղի, որի ջրերը թափվում են երկրով մեկ:

«Նիկոլ Փաշինյանը երեկ հայտարարել է, որ Արցախի կարգավիճակի հարց գոյություն չի ունեցել, տարածքների հանձնման խնդիր է եղել: Նա անբարոյական ստեր է տարածում, Նիկոլ, դու անբարոյական ես և դրա մասին վկայում են ոչ միայն իմ սուբյեկտիվ և օբյեկտիվ ընկալումներն ու գիտելիքները, այլ նաև այս երկու թուղթը»,-ասաց Աշոտյանը եւ թղթեր ցույց տվեց:

Դրանք վերաբերում են ԵԱՀԿ ՄԽ ռուսաստանցի համանախագահ Պոպովի պատասխանին, որը վերաբերում է Նիկոլ Փաշինյանի հոդվածին, որն իր հերթին վերաբերում էր 44-օրյա պատերազմին:

Աշոտյանն ասաց, որ նյութը հասանելի է ՌԴ ԱԳՆ կայքում. «Այս էջերի վրա գրված է եղել բանակցային ժառանգության մասին՝ հանձնվում է 5 շրջան, ստացվում է Արցախի միջանկյալ կարգավիճակ:

Երկրորդ փուլում պետք է հանձնվեին մյուս երկու շրջանները, ինչը պետք է կապնվեր Արցախի կարգավիճակի որոշման հետ»:

«Ինչքան ապուշ ու անբարոյական պետք է լինես, որ ժողովրդին հիմարի տեղ դնես»,-նշեց Աշոտյանը՝ հավելելով, որ Նիկոլ Փաշինյանը խաբել է ու կերել երեխաների գլուխը: