Հայաստանի Ազգային տոնին նվիրված միջոցառումներ Ռումինիայում

Սեպտեմբերի 21-ին Հայաստանի Ազգային տոնի շրջանակներում Բուխարեստի Հայոց մշակութային կենտրոնում բացվեց ցուցահանդես՝ նվիրված հայ գրատպության 500-ամյակին: Ցուցադրությունը կենտրոնացած էր Ռումինիայում հայ գրատպության պատմության, ինչպես նաեւ ռումին գրականության զարգացման մեջ հայերի ներդրման վրա: Հայ գիրքը մասնակցում է նաեւ նույն օրը Բուխարեստի Կարոլ Ա-ի անվան Կենտրոնական գրադարանում բացված Ստրադա դե Կ’Արտե գրքի մեկշաբաթյա փառատոնին, որտեղ Գրիգոր Նարեկացու «Մատյան ողբերգության», Վազգեն Վեհափառի Ավետարանի, «Ուրբաթագրքի», «Մատյան գիտության և հավատո» եւ Թեոդիկի «Տիպ և տառ» բարձրարժեք նմանահանումների կողքին ցուցադրված են Ռումինիայում հրատարակված հայալեզու, ռումիներեն եւ հունգարերեն հրատարակություններ:

Բուխարեստի Հայոց մշակութային կենտրոնում ցուցահանդեսի բացմանը ողջույնի խոսքերով հանդես եկան Ռումինիայում ՀՀ դեսպան Համլետ Գասպարյանը եւ Ռումինիայի Խորհրդարանի Ներկայացուցիչների պալատի նախագահ Վալերիու Զգոնեան: Այնուհետեւ ռումինահայ հայտնի պետական-քաղաքական գործիչ, գրող, Ռումինահայոց միության նախագահ Վարուժան Ոսկանյանն ընդհանուր գծերով ներկայացրեց հայերի անցած ուղին Ռումինիայում՝ ընդգծելով այն բարեբեր միջավայրը, որի շնորհիվ հայերը կարողացան լիովին ներգրավվել եւ մասնակցել ռումին գրականության առաջընթացին: Օրվա հիմնական բանախոս ակադեմիկոս Էուջեն Սիմիոնը նշեց այն վիթխարի ավանդը, որ հայերը ներդրել եւ այսօր էլ շարունակում են ներդնել Ռումինիայի զարգացման մեջ:

Այս առումով, Հայաստանի դեսպան Համլետ Գասպարյանն իր խոսքի մեջ բարձր գնահատեց Ռումինիայի արտաքին գործերի եւ մշակույթի, ինչպես նաեւ ազգային ժառանգության նախարարությունների պատրաստակամությունը, որոնք հավանություն են տվել հաջորդ տարի Ռումինիայում անցկացնելու ռումինահայ մշակութային ժառանգությանը նվիրված գիտական ու մշակութային միջոցառումներ: «Դրանք անց են կացվում Մշակույթի, գիտության ու կրթության ոլորտում համագործակցության միջկառավարական ծրագրի շրջանակներում, ինչը քաղաքական երկխոսության, Արեւելյան գործընկերության եւ Սեւծովյան ավազանի շրջանակներում գործակցությանը, միջազգային կառույցներում համագործակցությանը եւ տնտեսական հարաբերություններին զուգահեռ կարեւոր գործիք ենք համարում Հայաստանի եւ Ռումինիայի միջեւ միջպետական հարաբերությունների խորացման եւ զարգացման առումով»,- ասաց Հայաստանի դեսպանը:

Հայաստանի Ազգային տոնին նվիրված միջոցառմանը ներկա էին նաեւ Ռումինիայի Սահմանադրական դատարանի նախագահ Աուգուստին, ԱԳՆ պետքարտուղար Դան Պետրեն, գործադիր եւ օրենսդիր իշխանությունների բարձրաստիճան այլ ներկայացուցիչներ, դեսպաններ, քաղաքական եւ հասարակական գործիչներ, քաղաքապետեր, հոգեւոր պետեր, գործարար միջավայրի, մտավորական եւ ստեղծագործական շրջանակների դեմքեր, ինչպես նաեւ բազմաթիվ ռումինահայեր:

Մինչ այդ՝ սեպտեմբերի 14-ին, «Երեւանը Գրքի 2012թ. համաշխարհային մայրաքաղաքի» շրջանակներում գրական-գեղարվեստական երեկո էր տեղի ունեցել Կոնստանցայում' ռումինահայ ճանաչված գրող եւ հրապարակախոս Պետրոս Խորասանջյանի մասնակցությամբ: Սեպտեմբերի 29-30-ին Կլուժում նույնպես նախատեսված են Հայկական մշակույթի օրեր, որոնց առանցքը կազմելու են հայ գրատպության 500-ամյակին նվիրված ցուցադրությունները եւ դասախոսությունները:

Հայաստանի անկախության օրվա կապակցությամբ, դեսպան Գասպարյանի ստորագրությամբ, սեպտեմբերի 21-ին հոդված էր լույս տեսել Բուխարեստի Nine O’Clock անգլալեզու օրաթերթում: Հայաստանի դեսպանը հարցազրույցներ տվեց նաեւ ռումինական TVR1 հեռուստատեսության ծրագրերին: Հոկտեմբերի 6-ին նախատեսվում է դեսպան Գասպարյանի մասնակցությունը Ռումինական ռադիոյի Ճամփորդություն աշխարհի շուրջը մեկժամանոց հաղորդմանը, որի ընթացքում խոսվելու է Հայաստանի Ազգային տոնի, հայ-ռումինական հարաբերությունների, մշակութային ծրագրերի եւ Հայաստանի տուրիստական հնարավորությունների մասին:

Տոնի առթիվ ՀՀ դեսպանի անունով ստացվել են շնորհավորական ուղերձներ ռումին նախարարների, պետական, քաղաքական եւ հասարակական գործիչների, տեղական իշխանությունների ղեկավարների եւ անհատների անունից: