Ըստ Գևորգ Փարսյանի՝ նախատեսվում են եռակողմ բանակցություններ

1or.am-ը գրում է․

«Գորիս-Կապան միջպետական ճանապարհին երեկվանից սկսած անհանգիստ վիճակը շարունակվում է՝ ադրբեջանցիները փակել են միջպետական ճանապարհի Կարմրաքար-Շուռնուխ հատվածը: Երեկ ուշ գիշերին Մարդու իրավունքների պաշտպանը հայտարարություն տարածեց, որտեղ ներկայացրեց իրավիճակը․ «Տեղյակ եմ, որ ՌԴ սահմանապահ ծառայողները, ՀՀ սահմանապահները նույնպես տեղում վարել են ճանապարհը բացելու բանակցություններ, և քաղաքացիական մեքենաները դուրս են բերվել: Ըստ ստուգված տվյալների՝ բանակցությունները առավոտ են շարունակվելու. հրաժարվել են բացել»:

Այսօր առավոտյան էլ ԱԱԾ-ն տեղեկացրեց, որ օգոստոսի 25-ին՝ ժամը 23:00-ի սահմաններում, ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը:

«Նշված հատվածում գտնվող տրանսպորտային միջոցները տարհանվել են: Աշխատանքներ են իրականացվում ճանապարհը բացելու, մարդկանց և տրանսպորտային միջոցների տեղաշարժի բնականոն աշխատանքը վերականգնելու ուղղությամբ»,- տարածած հաղորդագրությամբ տեղեկացրել էր ԱԱԾ-ն:

Այս թեմայով փորձեցինք կապ հաստատել Կապանի քաղաքապետ Գևորգ Փարսյանի հետ։ Հարցին, թե այս պահին Սյունիքում ի՞նչ իրավիճակ է քաղաքապետը պատասխանեց․ «Այս պահին էլ դեռ նույն իրավիճակն է, երեկվանից շարունակում է փակ մնալ ճանապարհը, բանակցություններ պետք է լինեն, որոնք դեռ չեն սկսվել»։

Գևորգ Փարսյանի խոսքով՝ ադրբեջանական կողմի տարածած լուրը, թե իբր կրակոցներ են հնչել, ինչի հետևանքով իրենք ունեն զոհ, սուտ է:

«Կրակոցներ չեն եղել, նման բան չկա»,- ասաց Կապանի ղեկավարը՝ հավելելով, որ քաղաքում այս պահին բոլորի միակ մտահոգությունը ստեղծված իրավիճակն է: Ադրբեջանցիների թվաքանակի ու ճանապարհը փակելու մասին տեղեկություններ ստանալու նպատակով փորձեցինք կապ հաստատել նաև Գորիսի փոխքաղաքապետ Իրինա Յոլյանի հետ․ «Ես անընդհատ կապի մեջ եմ Շուռնուխ համայնքի վարչական ղեկավարի հետ, սակայն այս պահին հստակ տեղեկատվություն չունեմ։ Քանի որ Որոտան և Շուռնուխ հատվածն անցնել հնարավոր չէ, չեմ կարող ասել՝ ինչ է կատարվում այնտեղ, բայց մարդիկ, որոնց բնակավայրերից երևում է այդ հատվածը, ասում են՝ որոշակի կուտակումներ կան, անցուդարձ կա, բայց մանրամասներ չգիտեմ»: