«Անբարոյականություն». մարտի 1-ին սպանված Տիգրան Խաչատրյանի մայրն այսպես է հակադարձում դատախազին

Այսօր մարտի 1-ի գործով քննչական խմբի նոր ղեկավար, Հատուկ քննչական ծառայության քննիչ Վաղինակ Ջանազյանը լրագրողներին հայտնել է, որ պարկուճների մասով նոր ասելիք չկա, և քնչական խումբը չգիտի՝ ինչպես վարվել 4 ոստիկանների հետ, ովքեր մեղադրվում են «Չերյոմուխա 7» տեսակի զենք կիրառելու մեջ, քանի որ հայտնի չէ, թե նրանցից ո՞ր մեկի արձակած գնդակից են զոհվել ՀՀ քաղաքացիները, և, բացի այդ, նրանցից ոչ մեկն իրեն մեղավոր չի ճանաչել:

Այս հարցի շուրջ ԼՈՒՐԵՐ.com-ի թղթակիցը խոսեց մարտի 1-ի զոհերից Տիգրան Խաչատրյանի մոր՝ Ալլա Հովհաննիսյանի հետ:

Տիկին Հովհաննիսյան, ինչպե՞ս կմեկնաբանեք այս հայտարարությունը:

- Ես ուղղակի խայտառակություն կարող եմ որակել սա: Սկզբից սկսեմ. մենք այս իշխանություններից ոչ մի սպասելիք չունենք` բացահայտման առումով: Երկրորդ՝  մեզ համար արդեն վաղուց բացահայտված է մարտի 1-ը. և՛ սպանողների, և հրաման տվողների անունները մեզ հայտնի են: Երրորդ՝ եթե դատախազը՝ պ-ն Փիլոյանը, կանգնում, ասում է, որ 4 հոգին էլ հրաժարվել են մեղավոր ճանաչել իրենց. բա մենք իրենց հետ ո՞նց վարվենք, կլինի՞ 4-ին էլ դատենք: Դա, չգիտեմ, երկրի համար ուղղակի խայտառակություն է, երբ կա երեք  զոհ, երեք մարդասպան, բայց չորս հոգի կասկածյալ, ու չեն կարողանում չորս տարվա մեջ պարզել, թե չորսից ո՞ր երեքն են կրակել: Ես էլ ավելացնելու բան չունեմ: Եթե դուք «Կորսված գարուն» ֆիլմը նայեք, այնտեղ փաստահավաք խումբը հրավիրել է «Չերյոմուխա 7» օգտագործած ոստիկաններին հրաման արձակողին, և նա այնտեղ պարզ ասում է ամեն ինչ (ի դեպ՝ դա փաստահավաք խումբը չի մեկնաբանում, դա նրանց հարցաքննությունն է): Այդ ֆիլմում հրաման արձակողին հարցնում են, թե կոնկրետ Տիգրան Խաչատրյանին ո՞վ է խփել, նա ասում է, որ այնտեղ կանգնած այսինչ ոստիկանն էր «Չերյոմուխա» օգտագործել, և հրամայեցի՝ ասացի մեքենան առաջ է գալիս, մեքենայի շարժը կանգնեցրեք, ինքը կրակել է այնտեղ, որտեղ կանգնած է եղել Տիգրան Խաչատրյանը: Դրանից պարզ ի՞նչ է պետք, որ նրանք իմանան՝ ո՞վ է եղել: Եթե չեմ սխալվում, Ավետիք Աթաբեկյան է անունը էդ «Չիրյոմուխա» օգտագործողի՝ կոնկրետ իմ տղայի մասով: Այդքանից հետո կանգնել, ասել, որ ծնողները մեզ  չեն օգնում` ուղղակի անբարոյականություն կարող եմ որակել: Ավելի լավ կլինի, որ իրենք ասեն՝ մեզ վերևից թույլ չեն տալիս, մենք իրենց ավելի շատ կհարգենք, որովհետև գիտենք, որ իրենց ուժերից վեր է այդ սպանությունները բացահայտելն այս իշխանությունների օրոք:

Լավ, տիկին Հովհաննիսյան, բայց ի՞նչ ելք եք տեսնում ստեղծված իրավիճակից:

- Եթե նրանք, իսկապես, ցանկանում են, բայց չեն կարողանում հասկանալ՝ ո՞վ է կրակել, թող դրսից  մասնագետ հրավիրեն, ասեն՝ չորս կասկածյալ կա, որոնցից երեքը սպանել են, բայց չորսն էլ ասում են, որ մենք մեղավոր չենք. սա առաջինը: Երկրորդը՝ ո՞վ որտե՞ղ է կանգնած եղել: Եվ երրորդը՝ ես նորից եմ ասում՝ այդ փաստահավաք խմբի զեկույցը եթե դուք նայեք, հարցաքննվում են այդ «Չիրյոմուխա»-ն օգտագործող և «Չիրյոմուխա»-յի հրաման արձակող ոստիկանները: Այդ մարդիկ պարզ ասում են՝ ո՞վ է հրաման տվել, ո՞վ է սպանել. ուղղակի՝ ես չգիտեմ՝ ո՞նց կարելի է անտեսել այս փաստերը: Ոնց որ ես նայեմ լուցկուն, ասեմ լուցկի չի. տենց է դուրս գալիս:

Հիշեցնենք, որ մարտի 1-ի զոհերի հարազատները նամակով դիմել են Հայաստանի վարչապետ Տիգրան Սարգսյանին` համոզմունք հայտնելով, որ մարտի 1-ի սպանությունները ոչ իրավաչափ գործողությունների հետևանք էին։ Կառավարությունը մերժել էր «Ժառանգություն» խմբակցության առաջարկը` մարտի 1-ի զոհերի հարազատներին եկող տարվա բյուջեից 500 միլիոն դրամի փոխհատուցում հատկացնելու վերաբերյալ: Խորհրդարանական ընդդիմությունն իր առաջարկը հիմնավորել էր այն հանգամանքով, որ 2008 թվականի մարտիմեկյան դեպքերի ժամանակ նրանք դարձել են պետական մարմինների ոչ իրավաչափ գործողությունների զոհ: Մինչդեռ կառավարությունն իր մերժումը պատճառաբանել էր նրանով, թե համոզված չէ, որ զոհերի մահը ոչ իրավաչափ գործողությունների հետևանք է եղել:

Դուք նշեցիք, որ իշխանություններից էլ ակնկալիք չունեք, այդ դեպքում ինչու՞ եք նամակով դիմել Տիգրան Սարգսյանին: 

- Մենք չենք դիմել Տիգրան Սարգսյանին, մենք պահանջել ենք Տիգրան Սարգսյանից, որպեսզի իրենք տեր կանգնեն իրենց խոսքերին՝ չհրաժարվեն այն բառերից, որ մարտի 1-ի ժամանակավոր հանձնաժողովի նախագահ Նիկոյանն իր զեկույցում նշել է, որ, այո՛, իշխանությունների կողմից գործողություններն եղել են ոչ իրավաչափ: Այդ խոսքերից չորս տարի հետո վարչապետը կանգնում, ասում է, որ, ո՛չ, իրավաչափությունն ապացուցված չի. այ դա է մեզ զայրացնում: Փոխհատուցման մասով էլ ասեմ, որ մենք առանձնապես ակնկալիք չունենք. մենք շատ լավ գիտենք, որ վարչապետի համար մենք` զոհվածների ընտանիքներս, անցանկալի անձինք ենք, և որևէ փոխհատուցում իրենց բարի կամքով չի լինելու: Ուրիշ բան, որ Եվրոպական դատարանը պարտադրի: Ուղղակի՝ մենք պահանջել ենք, որ իրենք տեր կանգնեն իրենց` մի քանի տարի առաջ արած հայտարարություններին և չաղավաղեն այն, ինչ որ իրենք արդեն ասել են: