Նախկին մեղադրյալները՝ համայնքապետեր. Փաշինյանի «հեղափոխական» նշանակումները

Նիկոլ Փաշինյանի վերջին նշանակումներից հետո տպավորություն է ստեղծվում, որ որևէ համայնքի ԺՊ կամ ղեկավար նշանակվելու համար պարտադիր պետք է քրեական անցյալ ունենաս: Այսպես օրինակ՝ FIp.am-ը գրել է, որ Վայք համայնքի ժՊ Մխիթար Մաթևոսյանը մեղադրյալ է եղել պետությանը պատճառված վնասի վերաբերյալ քրեական գործով։

Հայաստանի քննչական կոմիտեն 2019-ի օգոստոսին հաղորդեց, որ Վայոց ձորի մարզի քննչական վարչությունում բացահայտվել է ՍՊ ընկերության տնօրենի կողմից պաշտոնեական դիրքն օգտագործելով՝ առանձնապես խոշոր չափերի առերևույթ հափշտակություն կատարելու դեպքը: Վայքի մարզադաշտին կից շինության ու համայնքային նշանակության այգու բարեկարգման համար քաղաքապետարանի կողմից հայտարարված մրցույթում հաղթել է «Մավշին» ՍՊԸ-ն, և նշված սուբվենցիոն ծրագրի համար կառավարությունը Վայոց Ձորի մարզպետարանին տրամադրվել է 120 միլիոն դրամ։ 2016 թ. մարտի 21-ից սեպտեմբերի 21-ն ընկած ժամանակահատվածում,  պետությունից խաբեությամբ առանձնապես խոշոր չափի գումար հափշտակելու դիտավորությամբ, ՍՊԸ-ի տնօրենը շինարարական աշխատանքների կատարման ընթացքում ծավալաթերթ-նախահաշվով նախատեսված աշխատանքներ մասնակի կատարելու և չիրականացված աշխատանքները կատարողական թերթերում ներառելով, պետության միջոցներից ավել է ստացել ընդհանուր 4.055.498.4 ՀՀ դրամ գումար` պետությանը պատճառելով առանձնապես խոշոր չափերի գույքային վնաս»: 

«Մավշին» ՍՊԸ-ի տնօրենը եղել է Վայքի քաղաքապետի ԺՊ Մխիթար Մաթևոսյանը, այս գործով նա եղել է մեղադրյալ, Մաթևոսյանին պատկանող շարժական ու անշարժ գույքի վրա արգելանք է դրվել՝ պետությանը պատճառված վնասը վերականգնելու նպատակով։ 

Քննչական կոմիտեից, «Փաստերի ստուգման հարթակի» գրավոր հարցին ի պատասխան, տեղեկացրել են, որ 3 ամիս առաջ քրեական գործի վարույթը կարճվել է՝ հանցակազմի բացակայության հիմքով, իսկ Մխիթար Մաթևոսյանի նկատմամբ քրեական հետապնդումը դադարեցվել է, իսկ բնակարանի ու մեքենայի վրա դրված կալանքը վերացվել:

Մի քանի օր առաջ էլ Ջերմուկի համայնքապետի ԺՊ էր նշանակվել Վահագն Արսենյանը՝ Աշոտ Արսենյանի որդին, ում հանդեպ նույնպես ամիսներ առաջ քրեական գործ կար հարուցված: Վահագն Արսենյանի հետ կապված 2019 թվականին հայտնի դարձավ, որ Քննչական կոմիտեն քրեական գործ է հարուցել նրա՝ զինծառայությունից ազատվելու դեպքով։ Գործը հարուցվել էր փաստաթղթեր կեղծելու, խաբեության այլ ճանապարհով զինծառայությունից խուսափելու փաստի առթիվ։ Վահագն Արսենյանը զինծառայությունից ազատվել էր առողջական վիճակի հիմքով։ Ամիսներ անց, սակայն, Վահագն Արսենյանի նկատմամբ քրեական հետապնդումը դադարեցվել էր, իսկ գործն էլ կարճվել։ 2019 թ. վերջին Երևանի քաղաքապետարանին ձյուն մաքրող և աղբատար մեքենաներ նվիրած ընկերությունների ցանկում էր նաև «Ջերմուկ գրուպը», որը 2 ձյուն մաքրող մեքենա էր նվիրել քաղաքապետարանին։

Օրերս հայտնի դարձավ, որ Արարատ համայնքի ղեկավար Հայկ Հայկյանին փոխարինեցին ժամանակավոր պաշտոնակատար Ասլան Ավետիսյանով: Ասլան Ավետիսյանն անցնում էր 2008 թվականի Մարտի 1-ի գործով, սակայն, 2021 թվականի մայիսին արդարացվել է, հիմա էլ Արարատում սպասվող ՏԻՄ ընտրություններին ընդառաջ համարվում է ՔՊ հիմնական թեկնածուն:

Ստացվում է, որ նախկինում նման բարքերը մերժածներն այսօր աջ ու ձախ պաշտոն են բաժանում քրեական անցյալ ունեցողների, անգամ եթե վերջիններս արդարացվել են` բաց է մնում հարցի բարոյական կողմը: