«Միայն իշխանափոխությունից հետո. ուրիշ ոչ մի ելք չկա». Սարգիս Քլոյան

ԼՈՒՐԵՐ.com-ի թղթակիցը զրուցել է մարտի 1-ի զոհերից Գոռ Քլոյանի հոր՝ Սարգիս Քլոյանի հետ՝ մարտի 1-ի գործով քննչական գործընթացների վերաբերյալ:

Հիշեցնենք, որ օրերս Մարտի 1-ի գործով քննչական խմբի նոր ղեկավար Վաղինակ Ջանազյանը լրագրողներին հայտնել էր, որ իրենք չգիտեն՝ ինչպես վարվել «Չերյոմուխա 7» կիրառելու մեջ կասկածվող՝ չորս ոստիկանների հետ:

Մարտի մեկի զոհերից Գոռ Քլոյանի հայրը` Սարգիս Քլոյանը, այսպես մեկնաբանեց ստեղծված իրավիճակը.

- Այդ հայտարարությունից մենք շատ վրդովվել ենք և ուզում ենք հայտարարել՝ թող մեզ ընդունի Հատուկ քնչական ծառայության նոր պետը: Մենք մարդասպանների անունները մի անգամ նշել ենք, տաս անգամ նշել ենք, տասնմեկերորդ անգամ կնշենք, կնշենք՝ ովքեր են սպանել «Չերյոմուխա 7»-ով: Չորս ոստիկաններ սպանել են երեք քաղաքացիների, որոնցից երկուսի անուն-ազգանունները գիտենք, գիտենք՝ ովքեր են սպանողները: Ես մի տարի, երկու տարի առաջ գրավոր գրել եմ Հատուկ քնչական ծառայությունում, հիմնավորել եմ՝ ովքեր են մեր երեխաներին սպանողները: Ավելին ասեմ՝ «Չերյոմուխա 7» գազային նռնակը խստիվ արգելված զենք է եղել, որը հայտարարել է ազգային ժողովի ժամանակավոր հանձնակատար Սամվել Նիկոյանը: Հատուկ քնչական ծառայության պետ Վահագն Հարությունյանին ասացի. «Դա խստիվ արգեված զենք է. ինչու՞ քրեական գործ չեք հարուցում այդ զենքն օգտագործողների և հրաման տվողների նկատմամբ»: Նա էլ ինձ պատասխանեց. «Իսկ ի՞նչ եք իմանում, որ քրեական գործ չենք հարուցում և չենք դատապարտում»: Ես ասացի. «Անցել է երկու տարի, և մահվան հանգամանքները չեն կարողանում բացահայտել, բայց չեք ձերբակալել հրաման տվողներին: Ես էլ գիտեմ, դուք էլ գիտեք՝ ովքեր են հրաման տվողները»: Ինքն էլ ասաց. «Իսկ ի՞նչ գիտեք, որ չենք ձերբակալի»: Անցել է երկու տարի, և չեն ձերբակալում, և մենք իրենցից ոչ մի ակնկալիք, ոչ մի սպասելիք չունենք: Իրենք շատ սուտասան մարդիկ են, իրենք չեն բացահայտելու էդ գործը. ուղղակի ժամանակ են անցկացնում՝ և՛ լրատվամիջոցներին, և՛ ժողովրդին, և՛ տուժողի իրավահաջորդին խաբում են.... ժամանակ են անցկացնում:

Ներեցեք, իսկ եթե Դուք ակնկալիքներ չունեք՝ ինչու՞ եք նամակով դիմել ՀՀ վարչապետ Տիգրան Սարգսյանին:

- Որպեսզի Տիգրան Սարգսյանին ես անմիջապես հայտնեմ՝ ով է սպանել իմ տղային: Նա ասում է՝ իրավաչափությունն ապացուցված չէ, ես Տիգրան Սարգսյանին ասեմ, որ իմ տղային սպանել է այսինչ-այսինչյանը, որ նա իմանա՝ ով է սպանողը: Միգուցե ինքը չգիտի՞՝ ով է սպանողը, մենք իրենից ակնկալիքներ չունենք, մենք իրեն ուզում ենք տեղյակ պահել, որ ծնողները և իրավահաջորդները լավ գիտեն՝ ովքեր են սպանողները, և հիմա որտեղ են գտնվում իրենք, ժամը քանիսին են սպանել, ինչ զվանի ունեն, ովքեր են՝ ազգանունները գիտենք: Իսկ ինչու՞ էս երկու-երեք տարի հատուկ քննչական ծառայությունը մեզ՝ զոհվածների հարազատներին, չի հրավիրում իրենց մոտ, հարցնում՝ դուք նորություն ունե՞ք, լուր ունե՞ք, ի՞նչ գիտեք, ի՞նչ չգիտեք: Միգուցե մենք շատ բան ունենք ասելու. ինչու՞ մեզ չեն հրավիրում՝ անծանոթ մարդկանց են հրավիրում, քաղաքացիների են հրավիրում... քաղաքացին ի՞նչ իմանա...:

Լավ, պարոն Քլոյան, դատախազ Փիլոյանը նշել է, որ այդ չորս ոստիկաններից չգիտեն՝ ովքեր են սպանել, հո չե՞ն կարող 4-ին էլ դատել: Դուք, այդ հայտարարությունը լսելով, ի՞նչ ելք եք տեսնում:

- Միայն իշխանափոխությունից հետո. ուրիշ ոչ մի ելք չենք սպասում: Իրենք չեն հայտնաբերել.... ինչու՞ չեն հայտնաբերել, որովհետև իրենք են սպանել: