Իտալիայում բժիշկը սեքսի միջոցով «բուժել» է կանանց քաղցկեղից և կորոնավիրուսից

Իտալական Բարի քաղաքում 60-ամյա գինեկոլոգ Ջովանի Մինիելոն պացիենտներին համոզել է, որ նրանք ունեն մարդու պապիլոմավիրուս (ՄՊՎ) և առաջարկել է բուժել այն սեքսի միջոցով։ Բժշկի խարդախության մասին հայտնի է դարձել այն բանից հետո, երբ խարդախության զոհերից մեկը օգնության խնդրանքով դիմել է տեղական Le Lene լրատվական ծրագրին։

Ինչպես նշում է Daily Mail-ը, Մինիելոյի կեղծիքը բացահատվել է այն բանից հետո, երբ 33-ամյա մի կին դիմել է ծրագրին։ Նա ասել է, որ գինեկոլոգը հիվանդներին առաջարկում է բուժվել սեքսով: Նրա խոսքով՝ ինքը բժշկի մոտ կոնսուլտացիայի էր գնացել, քանի որ չի կարողանում հղիանալ։ Բժիշկը կնոջն ասել է, որ նա ՄՊՎ-ի նշաններ ունի՝ չնայած բացասական թեստին։

Գինեկոլոգը պնդում էր, որ քանի որ ինքը պատվաստվել է ՄՊՎ-ի դեմ, նրա հետ սեռական հարաբերություն ունենալու շնորհիվ կինը վիրուսից անհրաժեշտ իմունիտետ կստանա։ Բժշկի տարօրինակ առաջարկից վրդովված՝ իտալուհին օգնություն է խնդրել հեռուստատեսության անձնակազմից, և նրանք սկսել են հետաքննություն: Լրագրողներից մեկը հիվանդ է ձևացել և եկել Մինիելոյի մոտ։ Ընդունելության ժամանակ նա հեռուստաալիքի աշխատակցուհուն առաջարկել է բուժիչ սեքսով զբաղվել իր հետ, եւ կինը համաձայնել է։ Զույգը հանդիպել է հյուրանոցի համարում, որտեղ նախապես տեղադրված տեսախցիկներ են եղել։ Երբ բժիշկը մերկացել է մինչև անդրավարտիքը, մի լրագրող մտել է սենյակ և բացատրել, որ Մինիելոն դարձել է հետաքննության հերոսը։

Շուտով պարզ է դարձել, որ գինեկոլոգը պացիենտներին բազմիցս կեղծ ախտորոշումներ է արել և որպես բուժման ամենաարդյունավետ միջոց առաջարկել սեքսը։ Իր փաստաբանի միջոցով բժիշկն ասել է, որ 40 տարի հաջողությամբ «բուժել» է կանանց։ Նրա խոսքով՝ ինքը երբեք չի պահանջել, որ իր հետ սեռական հարաբերություն ունենան։ Սակայն հետաքննության մասին նյութի հեռարձակումից հետո 15 կանայք հայտնել են, որ իրենք դարձել են Մինիելոյի զոհը։ Դատախազը հետաքննություն է սկսել, որն այս պահին տուժողներից տեղեկություններ հավաքելու գործընթացում է։