Վանաձորի նախընտրական ինտրիգները. ով ում դեմ է պայքարում ՀՀ երրորդ քաղաքում

Դեկտեմբերի 5-ին կայանալիք ընտրություններին մասնակցող ուժերի շարքում են ինչպես նորաստեղծ, այնպես էլ վաղուց գործող, բայց վերջին տարիներին ակտիվություն չցուցաբերած, որոշ դեպքերում Վանաձորում անգամ անհայտ կուսակցություններ։ Մինչդեռ խորհրդարան անցած ընդդիմադիր ուժերից որևէ մեկը չի մասնակցում Հայաստանի մեծությամբ երրորդ քաղաքի ընտրություններին։

Առաջադրված միակ դաշինքը Վանաձորի նախկին քաղաքապետ Մամիկոն Ասլանյանի գլխավորած նույնանուն դաշինքն է։ Նրա մրցակիցն է 4 տարի իր տեղակալը եղած Արկադի Փելեշյանը՝ Հայաստանի աշխատավորական սոցիալիստական կուսակցության կողմից։ Այս կուսակցության երկրորդ համարն էլ Մամիկոն Ասլանյանի մյուս տեղակալն է՝ Արման Բերնեցյանը, որ 2016 թվականին ավագանու անդամ էր դարձել Ասլանյանի գլխավորած Հանրապետական կուսակցության ընտրական ցուցակով։ Ըստ էության, Վանաձորի համայնքապետարանի աշխատակազմը երկու մասի է բաժանված։ Մի մասը 2016-ին Հանրապետականի ցուցակով համայնքապետ դարձած Մամիկոն Ասլանյանի թիմում է, մյուս մասը՝ նրա տեղակալների։

Վանաձորի ըտրություններին մասնակցում է նաև «Ալյանս» առաջադիմական ցենտրիստական կուսակցությունը, որտեղ վերջերս միավորվեցին Տիգրան Ուրիխանյանի և Տիգրան Արզաքանցյանի ղեկավարած քաղաքական ուժերը։ Կուսակցության Վանաձորի համայնքապետի թեկնածուն Կարեն Էդարյանն է, որ Վանաձորը 17 տարի ղեկավարած Սամվել Դարբինյանի մտերիմն է: Վանաձորի ընտրություններին մասնակցում են նաև իշխող «Քաղաքացիական պայմանագիր» կուսակցությունը, որի ցուցակը գլխավորում է Լոռու մարզպետ Արամ Խաչատրյանը, «Բարգավաճ Հայաստանը», որի թեկնածուն «Բարձրավոլտ էլեկտրացանցեր» ընկերության Հյուսիսային մասնաճյուղի նախկին տնօրեն Էդգար Բոջուկյանն է, «Լուսավոր Հայաստանը», որի ցուցակը գլխավորում է նախկին պատգամավոր Հրանտ Այվազյանը։

«Հայրենիք» կուսակցության թեկնածուն տեղի կառույցի ղեկավար Վահե Դոխոյանն է, ով ևս 2016-ի ընտրություններին Մամիկոն Ասլանյանի թիմից էր, Հանրապետականի ցուցակով ավագանու անդամ էր դարձել։ Վանաձորի ընտրություններին պայքարի մեջ մտնելու հայտ է ներկայացրել նաև «Ապրելու երկիր» կուսակցությունը։ Ընտրական ցուցակի առաջին համարը Վանաձորում գործող կաթի արտադրամասերից մեկի սեփականատեր Արտավազդ Ալավերդյանն է։ Վանաձորի ընտրություններին կմասնակցի նաև «Հանրապետություն» կուսակցությունը, որի ընտրական ցուցակի առաջին համարը նախկինում Ոստիկանության Լոռու մարզի տարբեր բաժիններ ղեկավարած Վազգեն Թորոսյանն է։ Կոմունիստական կուսակցության թեկնածուն կուսակցության տեղի կառույցի ղեկավար Անդրանիկ Ղուկասյանն է։

Վանաձորյան ընտրություններն ունեն երկու գլխավոր ինտրիգ: Նախ և առաջ այս ընտրությունների արդյունքներից է կախված Լոռու ՔՊ-ական մարզպետ Արամ Խաչատրյանի ապագան, եթե վերջինս ձախողի այս ընտրությունները, իսկ նման մրցակցության պայմաններում դա ավելի քան հավանական է, մարզպետի պաշտոնը կարող է բաժին հասնել Խաչատրյանի թիմակից Արփի Դավոյանին: Հետևաբար՝ Խաչատրյանը անելու է ամեն բան, որպեսզի Վանաձորում չգրանցվի Գյումրիի, Կապանի կամ Մեղրիի սցենարը: Մյուս կողմից` կա ևս մեկ ինտրիգ՝ կլինի՞ արդյոք կոալիցիոն կառավարում ՔՊ անհաջողության դեպքում, ինչպես եղավ Գյումրիում: Ուժերից և ոչ մեկը բացահայտ կերպով չի հայտարարել, որ հետընտրական փուլում բացառում է համագործակցությունը ՔՊ-ի հետ: Իսկ նայելով մասնակիցների ներկապնակին` այդ կոալիցիան ավելի քան հավանական է թվում, հետևաբար, անգամ անհաջողության դեպքում` ՔՊ-ն կունենա Վանաձորում իշխանությունից փայ պոկելու հնարավորություն:

Այս թեմայով Հարկադիր քարաթափում` Վանաձոր-Ալավերդի ճանապարհին Հարկադիր քարաթափում` Վանաձոր-Ալավերդի ճանապարհին Հարկադիր քարաթափում` Վանաձոր-Ալավերդի ճանապարհին Վանաձոր-Ալավերդի ճանապարհին իրականացվելու են հարկադիր քարաթափման աշխատանքներ Վանաձոր-Ալավերդի ճանապարհին քարաթափում է տեղի ունեցել