Փաշինյանի ո՞ր ծրագրերը տապալելու պատճառով է ազատվել Տիգրան Ուլիխանյանը

Օրեր առաջ հայտնի դարձավ, որ վարչապետ Նիկոլ Փաշինյանի որոշմամբ Տիգրան Ուլիխանյանն ազատվել է պետական վերահսկողական ծառայության ղեկավարի պաշտոնից: Երեկ էլ ներկայացնելով ծառայության նոր պետին` Փաշինյանը, խոսքի մեջ անրադառնալով Ուլիխանյանի կատարած աշխատանքին, նշեց, որ կային որոշակի խնդիրներ: Որո՞նք էին դրանք:

Շատերի կարծիքով` Ուլիխանյանի պաշտոնից ազատելու իրական պատճառը Փաշինյանի դժգոհությունն էր, որ ծառայության պետը չի կարողանում այսպես ասած` կեղտ գտնել ոչ սեփական թիմակիցների ղեկավարած կառույցում, ոչ էլ ընդդիմադիրների ղեկավարած համայնքապետարաններում: Սա, իհարկե, դժգոհություն է առաջացրել Փաշինյանի մոտ, ով ծառայության ստեղծումից ի վեր այն ծառայեցնում է սեփական քաղաքական խնդիրները լուծելուն:

Օրինակ՝ Փաշինյանի դժգոհության հիմնական առիթ է դարձել այն, որ ՊՎԾ-ն բավարար չափով չի քրքրել Սյունիքի համայնքապետարաններն ու համայնքապետերի գործունեությունը, որ լուրջ քրեական գործեր հարուցելու հիմքեր հայտնաբերվեն: Արդյունքում` նրանց առաջադրված մեղադրանքները կամ ծիծաղելի են, կամ փլվում են դատարան չհասած, կամ վաղեմության ժամկետի խնդիր ունեն եւ չեն կարող դատապարտման հիմք հանդիսանալ: Սիսիանում,  ըստ հանձնարարականի, ստուգում էին սկսած 2016թ–ից մինչեւ օրս եղած փաստաթղթերը։

Պետական վերահսկողական ծառայությունը Covid-19-ի գծով ստուգումներ է իրականացնում առողջապահական համակարգում՝ նախարարություն, բուժհաստատություններ։ Մամուլում տեղեկություններ տարածվեցին, որ վարչապետին ենթակա մարմնի կողմից նման ստուգումների պատճառը եղել է արդեն նախկին նախարար Արսեն Թորոսյանի հրաժարական տալու ցանկությունը, որի մասին նախապես տեղեկացված է եղել Փաշինյանը։ Թորոսյանը ցանկացել է ընդհանրապես հեռանալ իշխանությունից, սակայն Նիկոլ Փաշինյանը ստուգումների «զենքով» նրան պահել է իր կողքին։

Այն բանից հետո, երբ հանրության շրջանում լուրջ դժգոհություն ի հայտ եկավ կապված իշխանությունների՝ կորոնավիրուսի դեմ պայքարի արդյունավետության հետ, Փաշինյանը հանձնարարեց ստուգումներ սկսել արդեն Անահիտ Ավանեսյանի ղեկավարած կառույցում, ճիշտ է` պատճառը հավանական չարաշահումներն են, սակայն, պարզից էլ պարզ է, որ եթե ստուգումների արդյունքում վեր հանվեին փաստեր` դրանք կներկայացվեին հանրության դատին, և Փաշինյանն էլ կունենար առիթ այդ չարաշահումների հետ մեկտեղ նաև կորանավիրուսի դեմ տապալված պայքարը բարդել նախարարի վրա և ազատվել վերջինիցս:

ՊՎԾ-ն ուսումնասիրություններ էր սկսել նաև Երևանի քաղաքապետարանում, և սա էլ իր հերթին զարմանալու չէ, այն բանից հետո, երբ իր հրապարակային մեսիջներում քաղաքապետ Մարությանn ընդգծեց՝ ՔՊ-ից դիստանցիա պահելու իր ցանկությունը, Փաշինյանն անցավ գործի` որպես գործիք օգտագործելով հենց ՊՎԾ-ին: Զուգահեռ` ՔՊ-ականներն այս կամ այն ամբիոնից բարձրացնում էին քաղաքապետի ոչ լոյալ լինելու մասին թեզը:

ՊՎԾ-ն ստուգումներ էր սկսել նաև ԱԱԾ-ում։ Ըստ մամուլի` հրահանգված էր ուսումնասիրել ԱԱԾ ֆինանսատնտեսական գործունեությունը եւ հայտնաբերել այնպիսի խախտումներ եւ չարաշահումներ, որոնք հիմք կհանդիսանան ԱԱԾ նախկին տնօրեն Արթուր Վանեցյանի դեմ քրեական գործ հարուցելու համար։ 

Ինչպես տեսնում ենք՝ որևէ լուրջ բացահայտմամբ աչքի չընկած պետական կառույցն իշխանությունների ձեռքում ընդամենը քաղաքական մահակի և հետապնդման հավելյալ լծակի դեր է կատարում՝ չկատարելով իր բուն առաքելությունը, այն է՝ պետական համակարգում կոռուպցիայի, չարաշահումների և վատնումների դեմ պայքարը: Տպավորություն է, որ այդ կոռուպցիան և չարաշահումները բույն են դրել բացառապես այն կառույցներում, որոնք ղեկավարում են Փաշինյանի և իր թիմի համար անհարմար անձինք և քանի որ անհարմար անձանց վրա Ուլիխանյանը այդպես էլ կեղտ չգտավ, այդ սուրբ առաքելությունը վստահվեց Ռոմանոս Պետրոսյանին, ով կփորձի դրանով քավել Աբովյանում ՔՊ խայտառակության մեղքը: