ԱՄՆ-ում ըմբիշն ածելիով վնասվածքներ է հասցրել մրցավարին (տեսանյութ, լուսանկար)

Անցյալ շաբաթավերջին World Class Pro Wrestling-ի գալա-երեկոն ըստ պլանի չընթացավ: Բանն այն է, որ ըմբիշներից մեկը` Դևոն Նիկոլսոնը՝ Հանիբալ մականունով, անսպասելիորեն հարձակվել է մենամարտի մրցավարի վրա։

Մարզիկը սուր առարկայով կտրել է մրցավարի գլուխը, իսկ հետո սկսել խեղդել։ Տղամարդն սկսել է արյունահոսել, բայց դա ոչ մի կերպ չի կանգնեցրել մարտիկին։ Ներկաները չէին սպասում, որ մարտն այդ կերպ կավարտվի։

Տեղի ունեցածի մանրամասները պարզ են դարձել ծեծկռտուքից հետո: Նիկոլսոնը պլանավորել էր հնարքը ի սկզբանե, իսկ մրցավարի դերում ցանկանում էր վերցնել մի կեղծ մարդու, ում հետ նախապես պայմանավորվել էր։

Այնուամենայնիվ, ղեկավարությունը մերժել էր այս ծրագիրը. արբիտրների հետ պայմանագրերն արդեն կնքվել էին: Սակայն ըմբիշը չհրաժարվեց այդ մտքից, այլ պարզապես վնասվածքներ հասցրեց մրցավարին, ով հայտնվեց իր ձեռքի տակ։

Տուժածը` Լանդո Դելտորոն, հայտնվել է հիվանդանոցում: Այնտեղ նրա գլխին մի քանի կար են դրել։ Նրա կյանքին ոչինչ չի սպառնում։ «Տանը ապաքինվում եմ, դեռ ուժեղ ցավեր եմ զգում, բայց կապրեմ, շնորհակալություն ձեր աջակցության խոսքերի համար»,- ասել է նա։

World Class Pro Wrestling-ի ղեկավար Ջերի Բոստիկը արդեն հայտարարել է, որ Նիկոլսոնին կարգելեն մրցաշարին մասնակցել: «World Class շարժումն այլևս կապված չի լինի Դևոն Նիկոլսոնի հետ: Ես չեմ կարող և չեմ համակերպվի նրա հետ, ինչ տեղի ունեցավ երեկ երեկոյան», - ասել է Բոստիկը:

Իր հերթին ըմբիշը հերքում է իր մեղքը։ Նրա խոսքով՝ ինքը դատավորի հետ այդպես է վարվել, քանի որ նա չի արգելել դա անել։

«Այդ մրցավարը պետք է արյունահոսեր ածելիի կտրվածքներից: Նա ինձ ոչ մի հրահանգ չտվեց, իսկ դուք` մարդիկ, կարող եք դիտել կադրերը. ոչ մի հրահանգ ռինգում: Եթե նա ինձ ասեր, որ ցավ է զգում, ես կդադարեի: Նա գիտի: Ես չէի ուզում նրան վիրավորել»,- ասել է Հանիբալը։