«Հեղափոխության պահապաններ»-ի հիմնադիր Հայկ Ստեփանյանն այլևս չի աշխատում ԱԺ-ում

 «Հեղափոխության պահապաններ» նախաձեռնության հիմնադիրներից Հայկ Ստեփանյանն այլեւս խորհրդարանում չի աշխատում: Այս մասին նա հայտնել է իր ֆեյսբուքյան էջում:

«Սիրելի հայրենակիցներ՝

Դիմումիս համաձայն ավարտում եմ աշխատանքս Ազգային Ժողովում։

Շնորհակալություն եմ հայտնում ԱԺ նախագահին այս հնարավորության համար աշխատելու Ազգային Ժողովում։ Սա կարճ բայց շատ կարևոր մի ժամանակաշրջան էր, որի ընթացքում փորձել եմ հնարավորություններիս սահմաններում կատարել իմ առջև դրված խնդիրները։ Շնորհակալ եմ նաև ԱԺ նախագահի աշխատակազմին միասին աշխատանքի համար։

Բնականաբար ընդդիմադիր մամուլը արդեն իսկ սկսել է շահարկումները այս թեմայով։ Վստահեցնում եմ, որ իմ և ԱԺ նախագահի միջև որևէ խնդիր չկա։

Իմ քաղաքական հայացքները իհարկե չեն փոխվել։ Կշարունակեմ աշխատանքս այլ կառույցում ի նպաստ Հայաստանի Հանրապետությանը։

Կոչ եմ անում դադարեցնել զրպարտությունը և անտեղի շահարկումները այս թեմայով»,- իր ֆեյսբուքյան էջում գրել է Հայկ Ստեփանյանը։

Armlur.am-ը գրում է, որ Ստեփանյանը սեպտեմբերին էր աշխատանքի անցել  խորհրդարանում՝ զբաղեցնելով Ալեն Սիմոնյանի օգնականի հաստիքը:

Սակայն նա եւս ազատվել է աշխատանքից, սակայն առաջիկայում Պետական վերահսկողական ծառայությունում նոր պաշտոն է ստանալու: Իրականում այդպես վարվելու համար Ալեն Սիմոնյանն այլ նպատակ է ունեցել եւ նրա այդ որոշումը պատահական չէ:

Հիշեցնենք, որ  դեկտեմբերի 7-ին ծեծկռտուք էր տեղի ունեցել խորհրդարանում, որի շրջանակներում քննություն է ընթանում եւ նախաքննական մարմին են հրավիրվել դեպքին մասնակից պատգամավորները, նրանց օգնականները եւ ընդդիմադիր պատգամավորների օգնականները: Բանն այն է, որ իշխանական խմբակցության պատգամավորները բարձրաձայնում են այն հարցը, որ ինչ-որ պատմությունների կիզակետում գտնվող օգնականներն իրավունք չունեն աշխատել խորհրդարանում՝ օրինակ բերելով նաեւ այն հանգամանքը, որ նրանցից մեկը ԱԺ նախկին նախագահ Արարատ Միրզոյանի ծեծկռտուքի գործով է անցնում: Եվ ահա այդ նույն տրամաբանությամբ էլ աշխատանքից հեռացվել է նաեւ Հայկ Ստեփանյանը, քանի որ նա էլ եւ իր թիմի անդամներն աչքի են ընկել Հայելի ակումբի վրա հարձակումով: Այսինքն, այսպես Ալեն Սիմոնյանը ցանկանում է անխոցելի լինել: