Ով է Հայկ Մարությանի իմպիչմենտի նախաձեռնողը

Երեկվանից Երևանի ավագանու «Իմ քայլը» խմբակցությունը շրջանառության մեջ է դրել քաղաքապետ Հայկ Մարությանին անվստահություն հայտնելու նախագիծը։ Ըստ շրջանառվող լուրերի՝ գործընթացը նախաձեռնել է, մասնավորապես, ավագանու «Իմ քայլը» խմբակցության ղեկավար Արմեն Գալջյանը։ ԼՈՒՐԵՐ․com-ը մեկնաբանություն ստանալու համար կապ հաստատեց Արմեն Գալջյանի հետ, ով ասաց, որ քաղաքական գործընթաց է գնում, սակայն այլ մանրամասներ այս պահին չի կարող հաղորդել։

Ինչ վերաբերում է բուն հարցին՝ արդյոք ի՞նքն է եղել գործընթացի նախաձեռնողը՝ Գալջյանը ոչ հաստատեց, ոչ հերքեց․ «Օրենսդրության համաձայն նախաձեռնող չի կարող լինել մեկ հոգի, պետք է լինի նախաձեռնող խումբ, որը կազմված լինի ավագանու անդամների ընդհանուր թվի առնվազն մեկ երրորդից»,- նշեց նա։

Նշենք, որ Հայկ Մարությանի իմպիչմենտի համար անհրաժեշտ է 33 ստորագրություն։ Թեև «Իմ քայլը» ավագանու մի քանի անդամներ հրաժարվել են միանալ գործընթացին, սակայն 40 ստորագրություն արդեն հավաքվել է։ Գործընթացին միացել են նաև ավագանու ընդդիմադիր խմբակցությունները․ «Բարգավաճ Հայաստան»-ի բոլոր անդամները, իսկ «Լույս» խմբակցությունից միայն Անի Խաչատրյանը։ 

Նկատենք՝ քիչ անց ՀՀ վարչապետ Նիկոլ Փաշինյանը Կառավարության շենքում կհանդիպի ավագանու «Իմ քայլը» անդամներին՝ քննարկելու Հայկ Մարությանին անվստահություն հայտնելու նախաձեռնության մանրամասները:

Հիշեցնենք, որ վերջին շրջանում բուռն քննարկումներ են գնում այն մասին, որ Երևանի քաղաքապետի և իշխանությունների ջրերը մի առվով չեն հոսում։ Ավելին, իշխանությանը պատկանող լրատվամիջոցները ընդդեմ Հայկ Մարությանի հոդվածներ են հրապարակում։ Դրանցից մեկում նշվում է, թե պատերազմից հետո Մարությանը փորձել է իրեն առանձնացնել Փաշինյանի թիմից և հանդիպումներ է ունեցել ՀՀ 2-րդ նախագահ Ռոբերտ Քոչարյանի հետ։

Սոնա Հարությունյան